Nkosilathi Sibanda
UKUHLANZA idolobholo lakoBulawayo lalapho okuhlala khona izakhamizi kungumlandu womuntu wonke, njalo kumele kuqakathekiswe ukuze kuvikelwe impilakahle yabantu.
Lokhu kuvele ngemva kokuba izakhamizi zelokitshi leMakhandeni zihlanganyele lebandla leFaith Grace International Ministries ekuhlanzeni indawo yemavinkilini akoWoza Shopping Centre ngoLwesihlanu.
Abahlanganyele emsebenzini lo, babhode zonke izitolo kulindawo, bethanyela ingcekeza, baphinda njalo kwezinye izitolo behlanza langaphandle kwezindlu eziseduzane.
Ukhansila kaWard 11, uSuzan Sithole, obekhokhela umsebenzi wokuhlanza indawo, uthe ukugcina indawo ihlanzekile ngumlandu wabantu bonke njalo kudinga ukuthi abahlali basebenze ndawonye labakhokheli besigaba loHulumende, njengoba ukuhlanzeka kwendawo kuyingxenye yempilo.
Uthe izakhamizi akumelanga zihlale zilindele ukuthi izisebenzi zekhansili kube yizo ezidobha ingcekeza, kodwa kumele labo bazinikele ekugcineni indawo abahlala kuyo ihlanzekile
“Indawo ehlanzekileyo iqala ngomuntu munye ngamunye, ezipha umlandu wokugcina indawo aphila kiyo ihlanzekile. Izakhamizi kumele zisebenze ndawonye ukuze izitolo, imigwaqo kanye lezindlini kuhlale kuhlanzekile.
“Sonke silomlandu wokuvikela impilakahle yabantu lokwenza indawo yeMakhandeni loBulawayo wonke abe yindawo engcono yokuhlala,” kutsho uSithole.
Ibandla le-Faith Grace International Ministries, limelwe ngu-Phurofethi Arthur, uthe:
“Umkhankaso wokuhlanza indawo uyindlela yokukhuthaza abantu ukuthi babambane ekuthuthukiseni umphakathi abahlala kuwo.
“Thina njengebandla sikholwa ekusebenzeleni umphakathi lokwenza umehluko empilweni zabantu.
Ukugcina indawo esihlala kiyo ihlanzekile ngenye indlela yokutshengisa ukuthi silomlandu njalo siyabathanda abantu esiphila labo,” kutsho uMphurofethi Arthur.
Uthe umsebenzi wokuhlanza indawo lo ulungiselela umkhuleko omkhulu kanye lombukiso wamabhizimusi okuhlelwe ukuthi wenzelwe endaweni le ensukwini ezilandelayo.
Wengeze ngokuthi umkhankaso lo, wokuhlanza indawo uyindlela yokukhuthaza abantu ukuthi babambane ekuthuthukiseni umphakathi abahlala kuwo.
Umkhankaso lo uhambelana lohlelo lukaHulumende lokuhlanza ilizwe, oluthi uLwesihlanu wakuqala wenyanga ngayinye ubekelwe ukuhlanzwa kwezindawo zomphakathi, imizi kanye lezindawo zamabhizimusi.
Kusenjalo, iEnvironmental Management Agency (EMA) ikhuthaza abantu, amabandla, amabhizimusi lezinye inhlanganiso ukuthi bahlanganyele kumizamo yokugcina ilizwe lihlanzekile.
Umsebenzi lo uhambelana lesinqumo sokwakha indawo ezihlanzekileyo njalo ezivikelekileyo ngesikhathi ilizwe lilwisa ukufinyelela injongo zentuthuko zikaVision 2030, ezikhokhelwa nguMongameli u-Emmerson Mnangagwa.
