UKUHLAZIYA iNKONDLO

Ophezulu Stinta

Iqoqo lenkondlo: Umdumo wezinkondlo

Elalotshwa ngu N S Sigogo labanye

Inkondlo: Umkhuleko wami eyalotshwa ngu M M Sibanda

Okumunyethweyo

Imbongi ibetha umthandazo ngabantu bakibo abahlupheke kakhulu empilweni.Iyabalisa imbongi ngokuhlukumezeka okwenziwa abantu bakubo, belala ngendlala besidla okubabayo, kufuthe ngamandla lapho bebukela abezizwe bekhomba ngophakathi.Imbongi iyabubula eNkosini sengathi iNkosi ingawuzwa umthandazo wayo ikhulekela abantu bakibo abatinyelwa yibuhlungu benyoka lapho bedudulwa elizweni labokhokho babo.

Iyancenga imbongi ngelithi aluba iNkosi ibingawuzwa umthandazo, iphendule ukukhala kwayo kanye labakibo, ibone langelihlo layo ukuzincoma lokuzazisa kwabezizwe abababusayo elizweni elingelabo, abala lizwi akukho lokukodwa abangakutsho kumbe nje baphakamise ilizwi ngakho.Ubuhlungu benhliziyo buphumisa imibuzo eminengi kugoqela lokuthi pho kuze kubenini abantu behlupheka kangaka, amazwi la awafinyeleli na kuSomandla, yimibuzo ephuma ngokuhlupheka komphefumulo yonke le, lezinhlungu zokugqilazwa.Iyancenga imbongi sengani iNkosi ingathela umoya wemvuselelo phakathi kwemizi yabo kubuyele ukuthula okwakukhona bengakaze bangenelwe yizizwe zibadungulule zibahlukumeze, imbongi ikhalela ukwakhiwa kwemizwa katsha, kwemizi, ukuze bazithole bengabantu njalo belamakhaya baphume ekugqilazweni.

Ukusetshenziswa kolimi
Imbongi isebenzise ulimi olucacileyo ngempela oluhlabusayo ngendlela oludala ngayo umfanekiso wabantu laba abahlukumezekileyo, esenelisa lokubumba umfanekiso wengqondo, sibone abantu abathwele lemkhono ekhanda belila bethwele lobuso obungela njabulo ngenxa yokuhlukumezeka okukhulu abadlula kikho.

Imbongi igcwalise imibuzo engadingi mpendulo enkondlweni lapha izibonelo;
Nkosi, koba nin’ ungezw’ ukukhala lokububula kwethu? Ngumbuzo okhalayo oveza ubuhlungu bangaphakathi kwenhliziyo, kodwa kungekho lapha okungaphuma khona impendulo.
Nguban’ ongakhuluma kibo ngokususwa kwabo emhlabeni wabokhokho babo?

Akekho loyedwa umuntu ongenelisa ukugoqa umqondo wabantu abasuswe emhlabathini wabokhokho, akakho loyedwa umuntu ongathoba inhliziyo zabo kulokhu abadlula kikho.Yimibuzo engaphendulekiyo, kusweleka longaphendula ngoba iqukethe insindabaphenduli.Konke lokhu kuyisililo.