Online Reporter
UMENDO, ISAHLUKO 12
UGugu wehliswa yimota khona kanye eGwelu kunombolo 51/103 ekaMusa, lapho afika wakhulumisana lowayesehlala khona. Pho wayengasizwa isiNdebele kanti ngapha kuGugu isiShona laye sasingavuki.
Kwasiza umakhelwane walapha ngoba laye wayekilikiliza. Bezwana. Wamazisa ukuba uMusa wayesewahamba eGatoma. Wayesesebenzela khona. Wamangala uGugu. Wathwala nzima ngokwasekumehlele esechithe lemali ngethekisi esiza lapha. Wafisa ukuba nga uMusa wamlobela incwadi nje.
Wacina ecabanga uThulani uGugu. Wabalenhloni ngokuya kuThulani lanxa wayengelawo omunye umqondo. Wabona kungcono ayelala ubusuku obubodwa, lanxa othathawese babezakhuluma.
Wakhumbula okwenziwa nguThulani mzwana uNdaba emkhahlameza. Waveza ububele lobudoda bakhe phambi kukaNdaba uThulani, ngalokhu wamesaba uGugu, wamhlonipha.
Wazibona esegade ibhasi ebelethe iguqa lomntwana. Wayethwele ibhokisi lesikhwama lebhasikiti yokudla ibhasi iqonda eMkoba. Kwasekuhlwile lesilindo engasazi, wacabanga ukubuza inkamba yamapholisa. Wehlela kuyo. Waphanga wasizwa lijaha elamthwalisa ngomusa lanxa wayesesaba.
Emapholiseni wafika walandisa uhlupho ayelalo. Wayedinga uThulani Mhlophe ayengazithukuza kuye.
Inombolo wayengazazi kodwa esazi ukuba ufundisa esikolo sabensundu. Amapholisa adingisisa ngotitsha lo athatha uGugu ngemota baqonda kuleyondlu ababelayelwe khona. Bafikela kumakhelwane uMaNgwenya uGugu afika amtshela ukuba ungumzawakhe kaThulani.
Balinda kumakhelwane waze wafika uThulani ebusuku ehambisana lomunye umbalisikazi uMisi Mathonsi.
Wamphelekezela-ke uMaNgwenya umzawakhe kaThulani kuThulani, wafika wamethula esazisa uThulani ukuba wayefike engekho. Wabalokumangala uThulani ngomzawakhe lo. Wabemukela wangenisa okuSipho kwenye yezindlu zokulala.
UMisi Mathonsi wabukeka elokumangala ngesethekeli lesi esingumzawakhe kaThulani ayengakaze ezwe ngaso. Yena Mathonsi wayebukeka egqoke kuhle lempahla imfanela nxa siqathanisa loGugu, laye wazibona eyimpisi uGugu.
Wafika-ke wazethula uGugu ngodubo ayehamba ngalo uMathonsi esehambile. Watsho ukuba uthole uMusa sewasuka lapho ayecabanga ukuba uzaya khona. Wayelandisa esengula phezulu ngodubo lwakhe, laye uThulani wabona engesuye umntwana ukuba kafuni kumkhathaza.
UThulani wakubeka kwacaca ukuba pho azamkhathaza ngubani nxa esesaba yena. Waletha amacebo okuba ake ahlale aphathisane laye nanku edinga umuntu wokumsiza. Watsho lokuba uze sangilosi ethunyiweyo uGugu.
UGugu yena wathi wayehlose ukuya eTshabhani kunina omncane. Wamncenga uThulani ukuba ahlale laye ngoba engeke wamenza lutho. Lanxa nje uGugu wayefikelwa yikwesaba eyakhe imizwa ngoba weyendile elandela izifungo lemithetho yomtshado wahlala.
Waziduduza laye uGugu ukuba uThulani angeke amenza lutho ngoba laye ezihlonipha.Bacina bevumelene ukuba basizane.
Wachasiselwa-ke uGugu ngayezakwenza, ukupheka kanye leminye nje imisebenzi. Waphiwa amaphepha okuloba izincwadi ezazizayaphoselwa eposi nguThulani ngelilandelayo.
