Online Reporter
ASIPHINDELE EMUVA KUSAHLUKO 14
Ugwalo luyaqhubeka umama uMakhalisa okaNkala eletha kulesi isahluko uThulani, athi wavuka esiya eHwehwe lapho ayecelwe nguSindile ukuba amhambise ngemota khona. Lokhu sizwa kuthiwa akuhlalanga kuhle kuGugu ngoba esecabangela ukuba kwakungabe kuyintombi kaThulani uSindile.
Umlobi uyaqhubeka eveza ukuba laye uGugu wazibonela ukuba uyaziduba nje. Wayekunanzelela ukuba yena wadlalisa ithuba ijaha walekela lisamthanda. Umlobi uthi uGugu watshona elesizungu sikaThulani kodwa wabuye walibala esesenza imisebenzi yendlini exoxa laboMaNgwenya ngesiShona okwasekufanele asifunde.
Umlobi uthi ngoMgqibelo baphuma loThulani kuyiwa edolobheni. UThulani kubikwa wapha uGugu imali yokudinga izigqoko engaba ngamadola angamatshumi amane. Umlobi uthi kwamangalisa uGugu lokhu, wathembisa uThulani ukuba wayezayibhadala limali esesebenza. Umlobi uthi uGugu wathenga izigqoko, izicathulo lesikhwama. Wathungisa ezinye izigqoko ngamalembu ayewathengile. Wayekwenza lokhu eyedwa uThulani loSipho labo bezula besenza okwabo. Wabuya wayalungisa lenwele uGugu ezikamisa, wabonakala eseguqukile okumangalisayo.
Ngalelolanga abaphekanga endlini, bayakudla phandle eShulugwe. Badla, banatha bajabula. Sebengekhaya umlobi uthi zavulwa izimpahla ezaziyethengwa. UThulani wazibuka wazikholwa. UGugu kuthiwa wamangaliswa yikubona okuSipho lakho kuthengelwe ezakho uyise ayengeke azithenga. Zalinganiswa izimpahla sekulahlwe amaqhiye kuboGugu. Watshaya umlozwi uThulani ngokuntshintsha uGugu ayeseyikho khona. Wayesebona uGugu wakudala, umlobi uyakutsho lokho. Wazikhuza uThulani ekukhulumeni ngoMpela, uNdaba ebona ukuba lokho kwakumlimaza uGugu.
Umlobi uyaqhubeka elandisa ngohambo lwabo mhlalokho besiya emalokitshini komunye umuntu owayefunwa nguThulani.
Sebeqedile umlobi uthi babuyela endlini. UThulani wayenanzelela ukuba uGugu wayesentshintshile lanxa wayengakaqini nje. Lokhu umlobi uthi kwaletha imizwa ethile eyayisilele kuThulani. Ezinye intombi umlobi uthi wayezisola uThulani ezibona zilenhliziyo ezingasuthisekiyo njengoGugu.
UMakhalisa uphetha isahluko ngokwethula uGugu edingisisa ngeSonto yeWisili ayeyisonta ukuba yayingaphi. UThulani wathembisa ukuba babezahamba bonke laye ayelunguza esontweni.
