Online Reporter
UMENDO
Ugwalo lulotshwe nguB Makhalisa lo
Sikumbuzo Dabengwa
ISAHLUKO 4
Ibhasi uMaphiko yathi itheleka esilindweni uGugu evele eselinde kudala labantwabakhe.Babengathabile nje okhekhe ikakhulu okuSipho owayeseqotshwana.
Wayejabulela uyise owayezabathengela ezifela emlonyeni koBulawayo. UBonginkosi wayebakhaphile njengokuthembisa kukanina ukuba uzazobakhweza. UGugu wayenhliziyombili. Wayelokujabula abuye abelovalo lokuba kambe ngabe umkakhe esaphila.
Wayeke acabange ukuba mhlawumbe kasahlali kuleyondlu ayaziyo. Pho nxa sewaya kwenye indawo wayezakwenza njani. Khona ukungabhali – ke. Mhlawumbe angabe sewasuka koBulawayo kumbe elalisiwe esibhedlela ngokugula.
Yafika koBulawayo ibhasi uGugu waqonda kweziya eMpopoma. Wayesisitheka lemithwalo kanye labantwana waze wayafika. Ekufikeni wathola indlu ikhiyiwe kodwa ngemuva kokubhudula amakhiye phandle wacina esewatholile.
Lapha endlini uGugu wafica sekuntshintshile kumalembu amafasitela ayewazi. La ayelekene kabili, kulala akhanyela phandle, ayibulembu.
Wonela ukungena phakathi wankema njalo ngobuhle bayo indlu. Kunjalo nje okuSipho ngapha kwakuzitika esihlahleni sikamabhulosi owawuvuthwe kakhulu.
Endlini phakathi wathola njalo utshintsho kubalisa izihlalo ezazibutifitifi, amalembu ayechaywe phezu kwazo, amaluba embizeni eluhlaza, amanye ephondweni lwenkomo, imethi enhle kanye lokucwazimula kwendlu kwamqeda uGugu ukuba ngubani ongabe wayemthanyelela umkakhe.
Wathola njalo isambulena semali aziyenga ngokucabanga ukuba uNdaba wayesithengele yena. Wabona imifanekiso emdulwini ilengisiwe kodwa owakhe owawulengiswe ekufikeni kwakhe okokuqala wawungasekho.
Esathi uyalalisa uNdumiso endlini yokulala, wabona okwaphosa kwamdabula ngovalo.
Waya kukhabothi yempahla lapho athola okunengi okwamlimaza inhliziyo.
Wazibuza ukuba kambe akubonayo yikho yini? Wayedinga ukuba kambe nga sekulomunye umfazi lapha yini.Wadideka uGugu.Wenyanyà lalo umbheda.
Wabuyela wayahlala endlini yokuphumula. Wasukuma wangenisa impahla eyayisele emnyango.Wabuyela endlini yokulala ukuyathathisisa kuhle ayekubonile.
