Online Reporter
UMENDO, Ugwalo lulotshwe nguB Makhalisa lo
Sikumbuzo Dabengwa
ISAHLUKO 5
Endlini yokulala angena kuyo uGugu wakhakhamala ngakuthola khona. Izimpahla zemali ezazibekwe butshapha zazibukeka zingezowesifazana ohambela abantu ze ngobuncinyane bazo. Izigqoko zazingumhlambihlambi, izicathulo lazo ngokunjalo. Amakha okuziqhola umzimba, ubuso, inzipho kanye lezandla kwakuthe ne ekhabothini le eyayilesibuko sokuzibuka.
Wadana ngenhlobonhlobo yezinto lezi eziqeda imali yena umkakhe ayemalela emvala, emyenga ngokuthi kakudingi. Phela uNdaba wayesala ukuba azicombe ethi umthanda enjalo hatshi ukuba yinunu ngokuzicomba. Lapha wafica kungesi sokisi. Kwathi kakhale ekhumbula ukuba walicina ngomtshado isokisi. Wakhala uGugu, wacela kuMlimu ukuba amsize anqobe lesi silingo.
Esagxile emcabangweni ngalokhu akuthola lapha, wezwa izisinde phandle ezomuntu oqwaqwazelayo. Wahle wezwa kumenyezwa okuSipho, kuhaladwa ngomabhulosi wakho. Ahlangana- ke amakhosikazi ka Ndaba. UJenny loGugu.
Omunye evela empilweni yempucuko omunye evela kumpilo yemakhaya. Lokhu kuvezwa yikubukana kwabo omunye ebona umama oswele ifutha lokuzigcoba abemuhle yena ebukeka esasemutsha. UGugu wamkhangela emsusa phansi wabona ukuba lo ngumhlobo olichithamuzi owendela emadodeni abanikazi bengekho. Wamenyanya. Lanxa uJenny wamkhangela wameyisa uGugu kodwa wabona ukuba linina nje eliswele ukuphathwa kuhle. Bajamelana bebukana okokweyisana. UGugu wambona esenyanyeka uJenny ngobukhikhitha bakhe ikanti loJenny wameyisa uGugu ngokuswela ayikho khona. Babuzana ukuba omunye lomunye ungubani. Kwacaca kuGugu, wazimisela ukulwa laleli ikhikhitha esekhiye umnyango wagcina amakhiye esambeni sakhe. Isikhwama sikaJenny safuthwa ngefasitela sisiya phandle uGugu enqinekela izikhali ezazingahle zimgwaze .
Emva kokubuzana bephendulana ngokuba bangobani lapha . UGugu wambuza uJenny ukuba nxa ethi ungumkakhe batshadiswe nini koMsitheli. Wantela uJenny ethi uGugu ukubonile ukuba laye ulikhosikazi likaNdaba nanku ethole izimpahla zakhe endlini yokulala kanti njalo wakhonjiswa laye uJenny njengaye uGugu. Inkani le yenza uGugu wabaphezu kwakhe uJenny. Lanxa wazama ukuphuma abaleke ngefasitela wamdonsa uGugu wamsebenza, watsho lokutsho ukuba bonke abathathela abantu omkabo bangamakhikhitha bazabonela kuye ukuthi benziwani.
Badumelana, batshukana, badutshuzana, balumana, badlephana, babindana uJenny waze wathi zhi phansi uGugu phezulu. Watshaywa-ke uJenny waze waklabalala edinga uncedo.
Kwaliwa-ke uGugu ephethe embuza ukuthi ngubani owathi angene emzini wakhe. Wazama uJenny ukutsho ukuba wayengazi ukuthi uNdaba uthethe. Wacela isihawu. Kwalamula ukufika kukaNdaba . Kwehlula uNdaba waze wenza ukuba angene ngefasitela. Esephakathi kwaxatshanwa uNdaba wacina esebeke uGugu isandla. Lokhu kwammangalisa uGugu. UNdlovu umakhelwane kaNdaba laye weza elandelana loNdaba. Wafika laye wangena ngefasitela. Nguye owakhuza uNdaba ekubekeni umkakhe isandla. UNdaba wakuveza ukuba uGugu umedelelile ngokuza koBulawayo engabizwanga. Wamazisa uGugu ukuba kufanele alandele umlayo wakhe angenzi okwakhe.
Lanxa uGugu wazama ukumbonisa ukuba nguye olendandatho yakhe, kwehlula ukuba azwisise uNdaba . Wema ngokuthi kusasa kusayo uGugu kumele abuyele kuyisekazi ekhaya aze ambize. Baphuma loJenny baziyela etshwaleni betshiya uGugu labantwana bedidekile.
