Online Reporter
UMENDO: Ugwalo lulotshwe nguB Makhalisa lo
Sikumbuzo Dabengwa, ISAHLUKO 6
Sihlangana lo MaMthombeni, unina kaGugu ezigcikela amazambane emasimini. Kufika intombazana yakhe encane igijima izomazisa ukuba udadewabo wehle ebhasini.
Kuba yisimanga lokhu ukufika kukaGugu njengomuntu owendileyo engazange abike phambilini ngencwadi kodwa lokhu ibazisa ukuba uyeza.
UMaMthombeni watshiya konke ayekwenza waya ngekhaya. Uyise kaGugu laye wayengekho ekhaya.Kwadliwa isidlo semini kwaxoxwa ngokunengi.
UGugu wathola ithuba lokuba asusele unina ngodaba ayehamba ngalo. Lokhu wayekwenzela ukuba unina kube nguye ozabikela uyise ekufikeni kwakhe.
UGugu wendlala konke okwasekusenziwa ngumkakhe lekhikhitha lakhe edolobheni bona begxaza indlala njengengcuba ekhaya loMaZulu.
Unina wabuzisisa ukuba wayesemalile yini umkakhe njengoba uGugu esitsho ukuba uhambisana lekhikhitha eledlulayo. Kwavela- ke ukuba uNdaba wayemkhombe ekhaya kuyisekazi uMaZulu, laye owayengasamfuni uGugu ethi umfihlela ukudla.
Unina wamazisa uGugu ukuba kwakuzakuba nzima ukuba agcinakale lapha ekhaya funa abakoMpofu babethese icala lokugcina imuli yabo.
Lanxa uMaMthombeni wayethambile wayengafani loyise owayelukhuni engelakuguqulwa yilutho wazimisela ukuzama ukuncenga uyise kaGugu.
Nguye uyise oweza lecebo lokuba uGugu ekele ezokufunda ayekwenda ngoba yena yise engelayo imali yokuba aqhubekele phambili. Lelolanga unina wazimisela ukuba azame ukuchazela umkakhe ngohlupho uGugu ayekilo.
Abazange babuquthe ubuthongo bebindana lemicabango.UDube waze wafika belokhu bebheke ngawayizolo ezindlini zokulala.
UDube ufika nje unina ulokhu ecabanga ngokuba uGugu wenda bephikisana yena ethi kaqhubeke azuze ikhosi, uyise esala. Wenda uGugu engasebenzanga lakusebenza wathuthukisa imuli yakwabo kuqala.Imuli kaDube yayisimsinda nanku wayesethethe isithembo, imuli yagcwala phamu.
Ngaleli ilanga kufika uGugu, uyise wajabula esizwa ukuba intombi yakhe ikhona ethi mhlawumbe ivakatshile. Wonela ukuzwa ukuba imuke ekwendeni uDube watshiya lokudla engakuqedanga esizwa ukuba uGugu usengumabuya ekwendeni, isaliwakazi.Wabuzisisa wathola ukuba uGugu wayengalandelanga imilayo yomkakhe yokuba aye ekhaya kuyisekazi.
Njengoba babengathumelanga idombo lokuzachasisa ngokuza kuka Gugu, udubo lwaluzakuba khona ekuthini bemukele imuli yakoMpofu le.
UDube walandula ukubagcina, kwazise base bedle amalobolo kungaselandlela yokuwabuyisela.
Watsho lokutsho ukuba uGugu kuzamela abuyele kumkakhe kusayo, funa bathwale amacala.Watsho lokuba isithembo asizili nanku lonina ekuso.
Wazama uMaMthombeni ukuncenga langokutshisa komntwana ethi bahlale kodwa kwehlula ngamacala angabeleka ngokubagcina lalabobantwana. Yena uDube wahle wavuka ngovivi esiyadinga ivili lenqola engafuni ukubonana lamehlo entombi yakwakhe.
UGugu wakubona ukuba imizamo yakhe imkhomba kumkakhe ngoba lingekho ikhaya elalingamemukela ngaphandle kwasedolobheni lapho ayelemvumo ngomtshado ayelawo loNdaba endlini yabo yomtshado. Waphiwa amadola amabili ngunina.Wagada esebuyela labantwana, omunye evele esengogulayo.
