Online Reporter
UMENDO
Ugwalo lulotshwe nguB Makhalisa
Sikumbuzo Dabengwa, ISAHLUKO 7
Wehla koBulawayo uGugu kungoLwesine. Waganywa ngomunye ubaba wethekisi. Wayengajayelanga ukugada amathekisi kodwa lamuhla umumo wamenza wabona kungcono ukuba ahambe ngayo. Isimo sikaSipho sasingesihle, ehlanza njalo esequbuka umzimba kanti impahla kanye labantwana kwakungamandela. Wayenqineka kanje ngoba lonina wayeke watsho ukuba nxa kungonakala abakoZulu babezabethwesa icala.
Bahle baqonda eklinika yeMpopoma lanxa wayezathwala nzima labantwana esesuka lapho. Uvalo lokwesaba kwakuzenzela. Wangena wathola itikiti lokwelatshwa walandela abanye emzileni okwehola lonke etsheda. Sebethole usizo bamangala esebizelwa I – ambulensi sebesiwa eMpilo. Umntwana wayelomkhuhlane othelelwanayo, indingindi. UNdumiso laye wayesekhwehlekhwehlela esewuhabulile laye. Ngemuva kokuhlolwa lokhu eMpilo babizelwa eyinye njalo i- ambulensi isibesa eNazaretha.
Bathathwa bonke eNazaretha. Wakhala uGugu besehlukana labantwana. Watshelwa ukuba uzabe ezobabona nsuku zonke lanxa kungadonsa amaviki amabili kumbe amathathu. Wasuka esedidene ingqondo uGugu. Wathatha impahla zakhe eseyedwa wathi tshi ibhokisi ekhanda. Ezinye wazilengisa ngapha langapha. Nhlanhla ephuma isango wamelwa nguNesi Lunga owabalomusa wamthwala ngemota wayamtshiya emnyango wendlu yakhe eMpopoma.
Endlini wafica kungelamuntu kanti lamakhiye lamuhla ayengekho lapho ayefakwa khona . Wagozobala phandle uGugu. Lanxa wayefike kusakhanya kwaze kwahlwa elokhu equthe phandle. UmkaNdlovu owabalamula mhla wesiphithiphithi weza ukuzemcela ukuba azehlala endlini. Waqala wenqaba uGugu, kwathi okwesibili, izikhathi sezihambile wacina evuma. Kwatshaya ihola lesitshiyagalombili lehola lesificamunwe munye kanye leletshumi kulokhu kuthe zii koZulu. Wahubula uhololo komakhelwane baze baxoxisana ngomkhuhlane wabantwana. UGugu wezwa esengcono eseke walandisela omunye ngodubo lwakhe. Phela wayengumuntu ozwisisayo. Kwamhlupha ukuphuzisa umakhelwane wakhe ukuba alale , wabonga khona ukuba umkakhe wayengekho. Sekubanga ihola letshumi lanye, bezwa imota isima phandle. Kwazwakala owangakwakhe uGugu kanye lowesifazana kuqhunsuka uhleko ngomsutho wamabele. Walimala enhliziyweni uGugu.
Wangena nzima endlini ekade kungacatshangelwa ukuba uyeza. Wabuzwa imibuzo uGugu azama ukuyiphendula ngesineke ethi mhlawumbe umkakhe uzaba lozwelo lakubantwana abasebelaliswe esibhedlela kodwa lutho. Wakhwaza uNdaba engelasikhathi lakho ukugula lokho. Wabaphika abantwana ethi abakhe akazange athi bagade ibhasi eya eGwanda kibo kaGugu.
UNdaba waqonda endlini yokulala elandelwa nguJenny.Umnyango wavalwa kabuhlungu etsho lokutsho ukuba bangafa labobantwana oGugu labakwabo bazidlele bakholise inyama yabo. Lanxa balala kunjalo, uGugu ezigoqe ngobhayi endlini engeyakhe, wakhala zoma eyedwa. Ngale uNdaba kwathi dlwe emcabangweni ekhumbula abantwabakhe kodwa imicabango yozwelo losizi yehlulwa yile eyokuzithokozisa. Wavuka ngokuhwabha lokuthetha. UGugu waphindaphinda isaga esithi: “Umendo kawuthunyelwa gundwane.” Wazidla ngabantwana lokuyababona kwakhe. Wema ngemithandazo kwaze kwasa ebheke ngawayizolo.
