Online Reporter
UMENDO, Ugwalo lulotshwe nguB Makhalisa, Sikumbuzo Dabengwa
ISAHLUKO 8
UGugu wavuka ekuseni ekhangelele ukuxotshelwa phandle kodwa uNdaba wavuka engumuntu olunge njengemvu. Esemchazele kakuhle uGugu, uNdaba wafikelwa ngumcabango wendoda asebenza layo, uMhlophe, eyafelwa ngabantwana abathathu ngomkhuhlane lo wendingindi. Waba lozwelo wapha uGugu imadlana yokugada leyokuthenga amabhanana abantwana. Wathembisa ukuba laye wayezakuba khona ntambama esibhedlela.
Ukudla kwekuseni kwenziwa nguGugu, unyanewabo uJenny ethe bunyalala engutsheni. Phela uJenny wayejayele ukuzingela ntambama. Wayetshona elele emini kuthi ntambama ageze aye ezindaweni zotshwala ezingela. UNdaba yena wayesenyenyelwa yisenzo sokuhelisa izimbodlela zotshwala angahola. Wayezinathela bona nxa elebhabhalazi ekuseni angaze azuza ukudla okuqondileyo ngaphandle kwenyamanyana eyosiwayo enganganani, kucine kusenza utshwala buvame ukumdelela.
UGugu wasala egeqenga iguma, wahlanza lezitsha, walolonga endlini. Eseqedile wacabanga ukulobela umngane wakhe uMusa incwadi emazisa ngabantwana abasebegula. Welula inyawo wayayiphosela eposi.
Esibhedlela mhlalokho wafica uSipho esengcono kodwa uNdumiso elokhu ephathekile. Wabakhona umama owaphuma esekhala esetshelwe ukuba umntwana usedlule. Babesizwa usizi omama babantwana bekhumbula lokuba abanye obaba abazala asebeswelakele bangabe bengelandaba ngenxa yotshwala lesifazana esingalunganga.
Emini baya njalo ebantwaneni ngemuva kokulinda. UNdaba yena wafika muva ntambama. UGugu wamlandisela ngomumo wabantwana. Behlukana uGugu esesiya ngekhaya, uNdaba yena wathi usaya bonana lomngane wakhe.
Wathola kukhiyiwe njalo endlini uGugu. Waqutha phandle ekusithekeni. UNdaba esizwa ngokukhiyelwa kukaGugu phandle watshinga eveza ukuba uGugu nguye umnikazi walindlu ngomtshado alawo. Kwakuke kumhluphe ukwenza kwakhe kodwa akhulelwe yikuzithokozisa. Laye wayengasazazi kuhle ukuba ungumuntu bani ngezenzo zakhe. Lokhu wayekubona ngoba uGugu emazi engumuntu amfica eyintombazana eyayilungile.
Ngakusisa esibhedlela uNdumiso kwabikwa ukuba ulokhu enjalo. Lantambama kwaba yiso leso. UNdaba akafikanga kunguMgqibelo. Endlini wafika esethwelwe ngabantu eselimele egcwele igazi, umlomo uluphondo. UGugu kwamehlula ukuba ambikele ngokugula kubi kukaNdumiso yena uyise esenje. Kwasekumele uGugu akhudumeze amanzi amthobe uNdaba abuye amkhuphe lezimpahla ezigcwele igazi lomhluzi wotshwala. Wakwenza konke lokhu ethule uGugu.
Ekuseni kwafika isithunywa uGugu esalungela ukuya esibhedlela silombiko wokuba uNdumiso kasekho.
Watshona egozobele edideke yedwa uGugu. ONdaba bafika ntambama loJenny. Bazama ukuba losizi besizwa ngale imfa.
UNdaba wabika imfa le kuzihlobo kanye lasemsebenzini. Kwenziwa amalungiselelo wabekwa umntwana. UJenny wayehle wasuka lapha. Badlala iKhisimusi uGugu esosizini. Wacela ukuthengelwa inzilo, uNdaba wala ethi “Ofileyo ufile.” Wacina ephiwa ngumakhelwane iqhiye emnyama ayisikayo.
Walungela ukuya ekhaya kuMaZulu kodwa wafunga wagomela ukuthi ngeke enze lokho. Kwasekufanele ayezidingela umsebenzi ondle umntanakhe hatshi ukuba yisichaka sikaNdaba. Kambe okunye ukutshaphazwa yindoda okudlula lokhu kwakungaba yikuphi?
