marble nkomoUMENDO, ISAHLUKO 9
USipho wathi ephuma esibhedlela wayebukeka encwaba kungatshengiseli ukuba ubegula. Amatshathatshatha ebusweni lasemzimbeni yiwo kuphela ayekhanya. UGugu wabonga kuThixo ukutshiyelwa lesi sipho esinguSipho.
Kwathi sekusemini esendlini wezwa kusima imota phandle. Kazange anaka ecabanga ukuba yehlisa uNdaba loba uJenny. Ngemva kokuqoqodwa wavula, wathola umuntu ayengamlindele. Watshaywa luvalo ebona owemzini onguThulani ayengamkhangelelanga. Wamangala uGugu ukuba wayelayelwe ngubani lapha. Kwavela ukuba uThulani wayeze koBulawayo ngomtshado womngane wakhe ababebonke eKholeji. UMusa nguye owayephathise uThulani kuGugu.
UGugu wamkhangela uThulani wambona ukutshintsha kwakhe kumzimba wobuntshantshu kwezokweqa esikolo. Wambona esephethe uSipho waze wafisa ukuba uNdaba laye uyake aphathe indodakazi yakhe njengoThulani.
Babuzana ngoMusa lokuba wayemazisile ngokuswelakala kukaNdumiso. Bakhalelana uThulani wamduduza ngokutshiyelwa intombi engangoSipho lomkakhe uNdaba. UThulani wamazisa uGugu ngokufelwa kwakhe ngumkadadewabo owayengudokotela owabhubha engozini udadewabo etshayela imota. Abantwana ababhubha kuleyongozi babebabili kwasinda oyedwa. Watsho uThulani ukuba udadewabo kasabambi imota kusukela lelolanga. Uyethuka nxa elele. UGugu wazibona engcono lanxa walahlekelwa ngoyedwa umntwana. Wananzelela ukuba okwakhe kwakunganeno. Waduduzeka ebona abanye besebuhlungwini obedlula obakhe.
Baxoxa-ke kwavela ukuba udadewabo kaThulani wathathelwa ngabakwabozala impahla yonke ngaphandle kwamabhuku ebhanga. UThulani wapha uGugu incwadi eyayivela kuMusa. Muva kwalokho baphuma phandle bayabona imota kaThulani. Wayevele engumngane ayethi uzethembisa ukuba uzamthatha, wahluthunelwa nguNdaba.
Emoteni okuSipho kwasekusizakele okunkabi. UThulani wacela-ke ukuba bake batshaywe ngumoya. Lanxa wayesesaba ubuze bakhe uGugu, bacina behambile ngemota kaThulani.
Baxoxa ngendawo zokwethekela bacina bekhethe ukuya kwelemnyuziyemu. Bangena ezitolo bathenga okuloqhatshi olumnandi. Bahlala eduze lezimpophoma zamanzi ayetshoka esiyaphezulu. Kwadliwa.
Basuka bayangena emnyuziyemu uSipho elokhu ethokoza kumalumakhe onguThulani.Wayekujabulela ukunindwa ngeziwiji uThulani kodwa engelandaba. UGugu laye wakholisa ayekubona waze walibala izinhlupho ayelazo ngekhaya. UThulani kwamjabulisa ukuchelesa kukaGugu ebona isimo ayemthole ekuso. Babuka baze baya ephakhi baxoxa behleli emabhentshini. Babehleka bexoxa bejabula.
Kwabalithuba elihle leli kuGugu ukuphunyuzwa izinsizi zomuzi wakhe ayekuzo.
Online Reporter