Online Reporter
UMENDO, ISAHLUKO 10
UGugu wathi qaqabu ilanga selisiya kunina. Wananzelela ukuba nguye owayelamakhiye ngalelolanga. UThulani wananzelela ukuba ebusweni bukaGugu kwasekulokukhathazeka okukhulu.
Endleleni, uThulani wake wambuza uGugu ukuba uhlezi kuhle wachelesa ekwendeni. UGugu wavala ngokuhlukuluzeka ngokugulelwa ngabantwana.
Wazisola uThulani ngokubuza lokhu kuGugu nanku engayisiso isihlobo sakhe. UThulani wamnikeza imali engaba ngamadola amahlanu ethi uyamkhunga. Wakwala lokhu uGugu esesabela uNdaba ukuba wayezamsola athi uyicelile ngoba yena emncitsha ngekhaya.
Bathi befika endlini bathola uNdaba esejame walinda ngokucunuka okukhulu ebheke imota. UThulani wehla ephethe okuSipho kodwa uNdaba wasineka njengenja efuna ukuluma umuntu. Wayekhanya ukuthi wayeke wathi kha kancane.
Wabheka imota, izimpahla ezazigqokwe nguThulani, wabona lomkakhe eseceleni kwakhe, wafikelwa yikunengeka okudalwa ngumhawu.
Bakhulumisana kodwa uThulani wamangala ebona esinye isidandane esasisemukela amakhiye kuGugu. Senza angathi siyamhlekelela lesisidandane. Sazitshila sisiyavula umnyango.
UNdaba wabuza uGugu kabuhlungu ukuba kungani ehambe lamakhiye endlu yakhe kanye lomntanakhe. Wazama uGugu ukuchasisa kodwa uNdaba wazonda ukukhuluma kukaThulani kuhle evaleliswa nguGugu wavela wamhlala ngempama kanye lenqindi. UGugu wayawela phansi esopha igazi emlonyeni.
Wacunuka uThulani ebona owesilisa otshaya owesintwana, wafisa ukumenza kubi. Wacabanga wabona le kuyindaba yomuntu lomkakhe wazikhuza. Wabuye wabona uNdaba esehahabela uGugu futhi. Lapho wamsunduza kancane uNdaba, pho umuntu evele ezinathele wayakuthi dinsi phansi. UThulani waphakamisa uGugu embamba ngengalo zakhe.
UGugu laye wake wazizwa evikelekile ngumuntu wesilisa olothando. Wezwa eduduzeka, wakhohlwa bonke ubuhlungu ngalowo mzuzwana. Wananzelela ukuba wenza isifungo betshada loNdaba, walwa lemizwa le ayeselayo waphunyuka kuThulani elokulandula ukuthi ulimele.
Watshengisela uThulani ukuba kwakufanele ahambe. Wathi engakaphumi, uThulani wamazisa ukuba eze kuye kumbe kuMusa nxa eke waba lohlupho. Waphuma esempamanye uThulani.Wavuthela imota ngesiqubu esabiza amapholisa amisa, amhlawulisa imali.
UJenny wayezivalela endlini yokulala engelandaba lokwakusenzakala. UThulani wathi ephuma wasala emthaphile ngamehlo ngefasitela. Wayezibuza ukuba luswahla lwangaphi lolu lokuba wayengalubona ngaphi bebodwa axoxe lalo. Wacabanga ngaloluswahla walibala ngoNdaba.
Wazimisela ukuba wayezagubha uGugu, azingele loluswahla aze aluthole.
UNdaba waphaphama eseke wathelwa ngamanzi. Kasabuzanga uGugu, mhlawumbe utshwala basebuthe dlwe.
UGugu wamtshengisa izimpahla ezazivela kuMusa lamadola amabili ayevela kuThulani.
Wathi benzile oMthembo loMhlophe. Kasawuvusanga umsindo sekuthe dlwe ngoba utshwala lobu babuthanda ukumdelela. UGugu lomntanakhe uSipho babesendleleni yokuya ekhaya kungakho wayezasala ezijabulela kuhle sebehambile ekhaya.
