adminOphezulu Stinta
UMFILIJI simtshiye eseyelanda umdeni wakhe yena ujabulile kodwa kukhona nje okungacaciyo lapha kumamazala.
Kucaca nje ukuthi kukhona okutshaya amanzi. Amazwi kaninazala athi “usizi lumfake ezinkingeni eziningi uzamambatha ndodana” Umfiliji uphendula engagqize qhakala ngeliduduza uninazala ethi yena ukuba khona kwasekuzoziqeda zonke insizi lezo ayezibalisa.
Injabulo yayingekho kuninazala waze wayihluba indlubu ekhasini, wamazisa ukuthi uMashandu sowaphenduka isidakwa, usengowesifazane oselala avuke etshwaleni aze agcizelele nje ukuthi lalithi liphuma nje lisithi catsha yena ahle afake ingane eqolo ayetshona layo kulowomuzi lapho ababubhudla khona. Unina wayesekhuze wayekela nanku lempendulo wayelazo futhi kuyilezo ezithena madolo ngoba wayembalisela ngelithi umkhuza nje ngoba kakwazi ukuthi kubuhlungu kanganani ukutshiywa yindoda.
Waqhubeka ebuza umkhwenyana ukuthi kodwa wayezwile na ukuthi uZamambatha wakhe wayekhulelwe.
Kwakungathi indlebe zakhe azizwanga kuhle kodwa wayezwile uMfiliji lalapho zehla esihlathini sendoda loba nje kuthiwa ezendoda ziphelela esifubeni. Konke lokhu kwakuyizenzo zotshwala, akukho ngitsho lokukodwa okuhle okuphuma etshwaleni. Olukhulu akulamkhosi yikho nje enelisa ukukutsho uMfiliji. Yena wayekhangelele ukuzokwakha pho nxa sekunje kwakhiwa kanjani.?
Besakhuluma nje wathutsha uZamambatha ehaluzela, bananzelela njalo ukuthi eqolo lapha kwakulembeleko yokubeletha usana njengoba wayesehla esenyuka layo etshwaleni imihla lamalanga. Uninazala wambuza umkhwenyana wakhe ukuthi pho wayezimisele kukuphi ke emva kokumlandisela udaba olutshaqisa umzimba.
UMfiliji waphendula ngelithi konke lokhu okwenzakalayo nguye imbangela. Aluba wayekhona kwakungasoze kube lezehlakalo ezifana lalesi. Wayezimisele nxolo kanye lokwakha aqinise umuzi wakhe. UMashandu wayeziculela nje engakaze abone ukuthi lapha ekhaya kwakulesethekeli. Uthe lapho ethi mehlo suka lwamtshaya lwameqa uvalo.
Online Reporter