admin
Cornelius Luphahla
IZAKHAMIZI zesigabeni seMafa, eLupane ziphakathi kwetshe lembokodo ngenxa yezifuyo zazo eseziqedwe yikucuba ngenxa yendlala yamanzi kanye lotshani.
Udubo lolu kubikwa luhlasela kakhulu inkomo njalo luqale ukuzihlasela ekupheleni kukaMfumfu noma nje khathesi sezizinengi kakhulu inkomo esezifile.
UMthunywa uxoxe lesinye isakhamuzi sakule indawo uMnumzana Mbonisi Ncube oveze ukuthi inkomo esezicubile kule indawo zinengi kakhulu.
“Inkomo esezicubile kulesisigaba ziyedlula i40 njalo zicutshiswa yikusweleka kwamanzi. Indawo yakithi ayilamanzi ngakho inkomo zethu sizinathisa emigodini okudala ukuthi zingakholwa kahle.
“Khona inkomo kufanele inathe amanzi ize iwatshiye nxa siwafuna futhi kufanele iphinde ukunatha ukuze ingacaki. Ngakho thina ngeke senelise ukukwenza lokhu ngoba kunzima ukuwakhelela amanzi la njalo inengi lethu siyacela kwabanye abalemigodi ukuthi sinathise kibo,” kutsho uMnu Ncube.
Esinye njalo isakhamuzi sakule indawo uMnumzana Leonard Magutshwa ubikele intatheli ukuthi inengi lenkomo elicubayo ngezinsikazi.
“Ukucuba kwenkomo zethu kubuhlungu ngoba inengi lezicubayo ngezinsikazi okuyiyo inhlanyelo yethu yakusasa ngakho kusuka kube nzima ukufuya kulesisigaba seMafa ngenxa yokuswelakala kwamanzi.
“Ngikhuluma nje mina lonyaka ngicutshelwe ngamankomokazi amabili, eyinye yawo ifile sokusele eyodwa. Emnyakeni ophelileyo ngifelwe ngezintathu ngokucuba ngakho angisakwazi ukuthi ngithini,” kutsho uMnu Magutshwa.
Usobhuku wakule indawo uMnumzana Bikita Ncube uchaze ukuthi ukucuba kwenkomo sokungokwansuku zonke lapha.
“Ukucuba kwenkomo sokuyisililo sansuku zonke ngakho sesiphelelwe ukuthi senzeni sesize sibona kungcono ukuthi sifuye ezinye izifuyo hatshi inkomo,” kuphetha uMnu Ncube.
Online Reporter