Online Reporter
Sikhumbuzo Dabengwa
UMAZULU
UMaZulu nguyisekazi kaNdaba ovela kugwalo njengomuntu olothando. Simbona efundisa uNdaba aze abe yilokhu ayikho khona, yena engelabo abakhe abantwana abanakekelayo kanye lomkakhe owayesebenza umsebenzi ophansi.
Uyavela kugwalo ngesimilo esokuba lesineke. Simbona kugwalo esondla uNdaba amkhulise aze atshade elokhu engaphansi kophahla lwakhe, egumeni lakhe.
Yisineke esikhomba ukubekezela. Abanye abenelisi ukondla abantwana besihlobo baze bathathe, batshade.
Lanxa wenza umusa kuNdaba sibona eveza isimilo sokuba ngumuntu ololunya kubomalukazana.
Sibona kugwalo esibalesiphatho esibi sokuba lolunya ekuphatheni umalukazana wakhe ngokumcabangela ukuba uyathola ukudla okuvela kumkakhe uNdaba engazi ukuba uGugu uphakathi kwamalahle avuthayo.
Ulunya lokumxotsha ukuba atshiyane lempilo yokuhlala ndawonye azibonele yiyo eyaba yibunzima bempilo kuGugu.
Sibuye simbone engumuntu olenhliziyo embi eyokubalisela. Wabalisela uGugu konke akwenzela uNdaba umkakhe.
Lokhu kubalisela kwenza uGugu azimisele ukulandela umkakhe lanxa wayengabizwanga edolobheni ngokomthetho owawuphiwa amakhosikazi ngalezo nsuku.
Uyavela njalo engumuntu oyisihwaba. Sibona efuna ukuhlala esidla kuhle ngokulima abuye afune ukuphiwa izimpahla ezazingabe zithunyezwe nguNdaba. Kwakukuhle abuze isisusa sendaba engakasoleli uGugu kumpilo engayisiyo.
UMaZulu uvezwe engumlingiswa olesikhwili. Wathi ezondele uGugu wancitsha umntakaGugu inkobe kanye lamahewu ayewanatha, esidla echola kumbokodo.
Siqhubeka sibona uMaZulu uvezwa enguntando kayiphikiswa. Sibona kugwalo bekhulumisana kubi loGugu esala ukumlalela efuqela ekuthini uyancitshwa ukudla ngumkaNdaba athethe abhuqukeze. Sibona engafuni ukuba alalele uGugu owacina embona ukuba wayethwele nzima ekucineni kwempilo yomntanakhe uNdaba.
Uvezwe engumuntu olobuntu. Sibona ehlanganyela loGugu emva kokufelwa yingane eyodwa edolobheni. Wasukuma wayahlanganisa amehlo labanye kufiwe.
Ulenhliziyo yokuzisola. Sibona kugwalo uMaZulu ezisola ngesenzo sakhe sokusola uGugu engadingisisanga kabanzi kakuhle isisusa sendaba. Uthi ekunanzelela lokhu amazise uGugu ukuba wayengazi, atsho lokuba wayemesaba uGugu ngesibindi sakhe kanye lokulunga kwakhe.
Asiqhubekeni kwelizayo bafundi ngokuphutshisa abalingiswa abayivela kancane kugwalo kodwa besisiza ukuba ugwalo lwethu lwelukeke kuhle. UMaZulu ngomunye wabo lanxa yena engathi uqotshwana.
