Online Reporter
Sikhumbuzo Dabengwa
Nxa sihluzisisa, sihlolisisa izimilo zabalingiswa, sicubungula ukuba labo balingiswa bebeziphethe njani kugwalo. Bakhuluma njani. Baphila njani labanye abantu kanti njalo bacabanga njani ngabanye abantu. Konke abakwenzayo, abakucabangayo kanye lalokhu abakukhulumayo kubenza sithi bangabantu abanjani.
Kukhona umehluko kusimilo lesimo (ukubunjwa komuntu) Ekudingeni isimilo siyasiqamba leso similo ayiso sona umlingiswa, sibuye silethe isisekelo esivela kugwalo ukutsho ukuthi kungani sisithi uyilokhu esithi uyikho khona.
1. UGUGU
Kugwalo lolu uGugu uvezwe engumlingiswa olokubekezela. Sibona kugwalo uGugu ehlupheka ekwendeni ehlutshwa ngumkakhe kodwa aqhubeke ezama ukuhlalisana loNdaba owamlethela ikhikhitha endlini, bahlala bebabili endlini yinye. Lokhu kwaveza ukubekezelela izenzo ezimbi zikaNdaba.
Sibuye simbone engumuntu olothando uGugu. Lokhu sikubona kugwalo lapho enakekela abantwabakhe yedwa begula esibhedlela uNdaba ezinathela utshwala engelandaba kangako ngokugula kwabo.
Uyavezwa kugwalo engumuntu olobuntu uGugu. Sibona uGugu evuma ukuhlala lekhikhitha likaNdaba ndlu yinye yona ithengwe ngebizo lakhe lomtshado wakhe loNdaba. Akaphili ngodlame kodwa uqhubeka ngempilo yakhe elobuntu obuhle kunzima kunjalo
UGugu uvezwa engumuntu olesineke kugwalo. Sibona uGugu emelana lezigigaba zikaJenny loNdaba ababetshiya bekhiyile endlini afike abalinde ngokuthula yena enguye umnikazi muzi lapha ekhaya.
Sibuye simbone engumuntu okhutheleyo. Sibona kugwalo uGugu eseqale impilo entsha emva kokuhlukuluzwa nguNdaba, usebenza ngokuzikhandla esengumbalisi aze ayekufundela ngenxa yokusebenza nzima.
UGugu uvezwe njengomlingiswa onanzelela amaphutha akhe. Sibona kugwalo uGugu ehlolisisa impilo yakhe loNdaba asuke ayedinga umsebenzi kubangane bakhe eGwelu.
Ukunanzelela ukuba akasafunwa nguNdaba kwamsukumisa waqala impilo entsha eyaphetha imthuthukisa.
UGugu uphinde avezwe engumuntu olesibindi. Umelana lokugulelwa ngabantwana eyedwa ukuze kubhubhe oyedwa elokhu ebalanda esibhedlela eyedwa izikhathi ezinengi.
UNdaba wayengasekeli inhlupho zabantwana ezitshonela loJenny ikhikhitha lakhe lanxa wayegulelwa ngabantwana.
Sithola uGugu evezwa engumuntu okhaliphileyo ekucabangeni. Sibona ehlala loThulani okwesikhatshana abuye avalelise ukuze ayekwakha okungokwakhe. Ngokusuka kuThulani, uthenga izimpahla zendlini athuthuke esehlala yedwa. Sizaqhubeka kwelizayo bafundi.
