Vusumuzi Dube
Ugwalo: Umendo
Olulotshwe NguBarbara C Makhalisa
Isahluko 18
Sikhumbuzo Dabengwa
Ugwalo luyaphetha sihlangana loGugu ethola uNdaba esethe kho emzini wakhe. Wankema uNdaba ukuba uGugu wayefike engoculayo kodwa wathuliswa yikubona yena. Wazimisela ukuba alandisele uGugu ngokwenziwa likhikhitha lakhe elinguJenny. Walandisa ngokuqilwa kwakhe nguJenny owayethi wayethole ucingo luvela kubo. UNdaba wayemuphe imali lemfanelo yonke kodwa ngemva kwamalanga wezwa kuthiwa u Jenny wayesehlala eLuveve lomunye.
UNdaba walandisa njalo ukuba wayakhona eLuveve wamthola sibili elomunye ayesehlalisana laye.Lowomuntu wafika wamtshaya uNdaba, waphosa wamlimaza. Wabotshwa-ke uNdaba wavalelwa esitokisini. Walahlekelwa ngumsebenzi ngokubotshwa izinyanga ezine. UNdaba waveza ukuba uJenny kazange ayembona ejele. Wasola kanye lezihlobo zakhe ukuba azizihluphanga ngaye. Waxolisa kuGugu watsho lokuba aluba wayemphethe kuhle wayezabuya azombona.
Esephumile ejele wathola indlu isihlala abanye abantu ngoba yayingasathelelwa. Ikhikhitha elinguJenny labutha konke elalikufuna lathengisa okunye. Okwakusala wayekuganda ukuze kungasebenziseki. Wasala lempahla yona leyo ayeyigqokile ayiphiwa esephuma ejele. UNdaba watsho ukuba wayelidinga ikhikhitha elinguJenny.
Waxolisa kuGugu ngendlela amphatha ngayo. Wathembisa ukuba akazukumhlupha kodwa angamnika imali yotshwala legwayi uyaqhubeka edinga uJenny.Wala ukugeza uNdaba, walala phansi encithika enjalo. Kusayo uGugu wavukela esikolo lapho atshayela uThulani ucingo embuza ukuba azombona emsebenzini. Wamangala uThulani ukuzwa ngoNdaba. Kwamhlupha esebuyela kowakhe umsebenzi emini. UGugu wayemazisile uThulani ukuba akaseyikwesula umtshado wakhe loNdaba ngoba uNdaba ekusimo sokumdinga kakhulu ukwedlula uThulani. UGugu watsho ukuba angeke abalekela umkakhe ekusimo afunga ngaso emtshadweni phambi kukamfundisi. Wafunga ukuba bazakwehlukaniswa yikufa.
Baphikisana uGugu loThulani. Wadana uThulani ukuba uGugu wayezamtshiya okwesibili emtshiyela inja enguNdaba. Kwabazinyembezi kuphela kuGugu. Sebeduduzana uGugu wamazisa uThulani ukuba wenzela ukuba uthando lwabo lungelekwa lithunzi likaNdaba.
Ntambama bonke baya kuzindlu zabo bafika bazijika emibhedeni. UThulani wavuka waqonda kuGugu efuna ukuyabonana loNdaba uqobo. Wayengekho uNdaba esuke ethethe idola waziyela etshwaleni. Besaxoxa oGugu lo Thulani kwafika ucingo olwalubiza uGugu esibhedlela. UNdaba wayesegwaziwe kubi esengozini yokufa. Baphuthuma bobabili bafica sekusele udokoza. Wahle wabatshela ukuba banqobile bobabili.UNdaba wacela uThulani ukuba agcine kuhle uGugu ngoba elunge kabi. Waphela bemkhangele. Wayeqalane lexukwana labafana ebhawa, balwa bacina bemgwazile. UGugu walala ehlezi ekoThulani.
Abantu baziswa ngemfa kaNdaba. Wabekwa yilabo ababesazi uGugu. UMaZulu wayekhona. Wacela uxolo kuGugu etsho lokuba wayemesaba. UThulani waba yinsika yakhe uGugu. Kwenziwa amalungiselelo okuba uThulani alobole ukuze batshade loGugu. Bamisa elomtshado.
Online Reporter