Online Reporter
Ugwalo: Emfuleni Wezinyembezi olwalotshwa ngu-Ezekiel S K Hleza
Ophezulu Stinta
Ngeviki edluleyo sitshiye sekwehle iphupho phakathi komuzi kaMalandu kanye loMasuku. Amakhosikazi ayeselahle ithemba ngokuthi babengaphinda bahlangane futhi labomkabo bengabaphilileyo, kodwa-ke izimanga zona ziyenzeka. Imuli zombili sekuxoxelwana ngezindaba zonke ezenzekayo usizi olukhulu ukuthi umzali uyabe sebuza ngabantwabakhe sengathi ngumuntu wemzini ngenxa yomumo obuhlungu kangaka owehlukanisa abazali labantwana.
UMalandu ubuza ngentombazana yakhe uSehlulizitha ukuthi pho yena wayeginywe yiwuphi umgodi. Njengebizo lakhe kukhanya-ke wazehlula izitha kwathi ngemva kokulimala ibele sebengenelwe ngamabhunu wathola ithuba lokwelatshwa phandle kwelizwe, elizweni lase Yugosilaviya.
Ekusileni kwakhe kazange aphenduke ekhaya kodwa wananzelela ukuthi banengi abantu abadinga usizo ngakwezempilakahle kakhulu ngesikhathi somumo wempi le ababhekane layo. Wahle wakhetha ukufundela ukuba ngudokotela. Ngempela waveza ubuqhawekazi ukuthi angaze waqedwa amandla ngumumo kodwa akhangele phambili ngelihlo elibanzi. Ngemva kokuqeqetsha kwakhe uSehlulizitha wahle wayasebenzela kwelaseLusaka lapho ayelindele khona ababuya belimele bevela elizweni lakibo.
Kambe kungathiwa kazange ayilwe impi umuntu oqhuba ngohlobo olunje. Liqhawekazi langempela leli, iqhawe lamagama, elananzelela lapho okulesidingo khona langena lalwa impi yesineke kanye lothando lokwelapha imiphefumulo.
USehlule wehlula inhloso yesitha yokubulala yena wema ngelithi uzasiza, elaphe abuye njalo aphilise. Lokhu kwayijabulisa inhliziyo kaMalandu ngempela ukubona ukuthi elizweni lakibo zasezikhona izifundiswa, kwakuletha inhlasi yokuphila, ukuthi mhlazana ilizwe lithathwa bonke laba babezabuya elizweni lakibo bazelithuthukisa, balethe ukukhanya kuvuselelwe amanxiwa.
Kwakungasoze-ke kube lesidingo sokucela izifundiswa zangaphandle. Kwaba yisikhathi senjabulo lapho sekumenyezelwa lakumawayilesi ukuthi amajaha eganga azobuthana ezinkambeni ndawonye ukuze kukhethwe umkhokheli omutsha okhethwe ngabantu. Lokhu basebekwenza ngesivumelwano sombuso welizwe esitsha kulandelwa izisekelo zesivumelwano sekusobala-ke ukuthi lase lisiya ngomtsha wendoda, kulabo ababekhangelele ukuthumba isizwe sabamnyama.
Kwasekuzakhanya kwelabansundu.
