Online Reporter
Ugwalo: Emfuleni Wezinyembezi olwalotshwa ngu Ezekiel S K Hleza
Ophezulu Stinta
Ngeviki edlulileyo sethule isingeniso ngabalingiswa, lapho esixoxe kakhulu ngalokho okukhangelwayo nxa sicubungula abalingiswa.
Siqala ukukhangela umlingiswa uMalandu, yindoda eyayikholelwa kuMdali ukholo lwayo lugxile lwaphelela. Yindoda ethi loba idlula phakathi kwesigaba esingelula empilweni, ilingwa ihlukumezeka yale ibambelele ekholweni lwayo, lokumethemba uMsindisi.
UMalandu yindoda engazicabangeli yona yodwa kodwa ufaka abanye abantu phambili, siyananzelela ukuthi lapho indaba zombangazwe seziphakama yena usukuma lebhayibhili lakhe aqonde enkonzweni esiyaphakamisa abazalwane ebaqinisa, ebanika ithemba kanye lomumo abaphakathi kwawo.
Yindoda ephakamisa imfundo, lokhu sikubona lapho sisizwa ngendodakazi yakhe eyayisiqeqetshe yaze yafika elizweni lase Nigeria. Engasekeli ezemfundo wayengasoze aqhube indodana yakhe iyefika kuleliyana zinga lemfundo engela mfutho wemfundo yena njengomzali.
UMalandu wayejikeme njengendoda, kwathi lalapho amasotsha emqukula esontweni beqonda laye emzini wakhe, kukhulunywa ngendodana yakhe uDingilizwe kazange ethuke kumbe adlwanguluke esengofuna ukuzwisisa okungabe kwenzakele, yindoda nje ethatha izinto ngomoya ophansi ukuze izwisise okwenzakalayo kuhle kuhle. Wayelenhlonipho, ehlonipha abantu bomthetho ngempela ngoba kazange atshone ezilingana kumbe ephikisa lapho esizwa amazwi aphambanisa umqondo ngendodana yakhe
Njengomuntu wonke, laye uyafikelwa yikwethuka atshaywe luvalo lokhu kusitshengisa ukuthi ngumlingiswa ophilayo lo. Esefike esikolo seManama, esebuzwa ngamagama aphiwa etha abantwabakhe kusobala lokuthi uyacalwa, abuye abone abazali abame labantwana besikolo njengomzali wonke opheleleyo kugijima imibuzo eminengi ekhanda, ezibuza ukuthi pho ngabe sekwenzakeleni ngendodana yakhe.
Engaso mlingiswa opheleleyo wayengasoze athinteke langasiphi isenzo somntanakhe, kungakhathalekile ukuthi kwakuliqiniso kumbe kungamanga. Ngumuntu olesihelo, lapho esezwe ngencwadi eyayibhalwe nguDingilizwe, inyembezi ziyehla ekhala ngokuzala. Kwakumqeda amandla okwakwenzakele. Lalapho bebotshwa wahamba ngesizotha, elokholo ukuthi uSomandla uyabalwela, yindoda engalahli ithemba, yavalelwa entolongweni yatshiya imuli emuva ngethemba lokuthi bagcinakele.
