Online Reporter
Ugwalo: Emfuleni Wezinyembezi olwalotshwa ngu Ezekiel S K Hleza
Ophezulu Stinta
Ngeviki edlulileyo besixoxa ngabalingiswa abamqoka esihlangana labo egwalweni lwethu, lapho esicine sixoxa khona ngoMalandu sinanzelela izehlakalo adlula phakathi kwazo lokuthi zimtshiya engumlingiswa onjani. Sikhangela uMaMoyo inkosikazi kaMalandu, onguye ozala amasotsha akhetha ukulwela inhlangothi ezitshiyeneyo.
Ngowesifazana ohlangana lobunzima obukhulu empilweni. Unyamalalelwa yindodana yakhe elethemba lokuthi iyefunda esikolo, kusephakathi uhlangana lensindabaphenduli yendaba ngelithi indodana yakhe uDingilizwe yayisifulathele isikolo isiyedinga impilo yokuthula idingela umdaka onsundu umhlabathi kanye lamalungelo abo.
Kusenjalo umyeni wakhe uyahluthulwa ngesiga sendodana yabo, phakathi kwakho konke lokhu siyananzelela ukuthi ulemizwa njalo ngumlingiswa ophilayo ngoba uyephuka emoyeni wakhe adabuke ngaphakathi ngomumo angena kuwo. Ngumlingiswa othi lanxa engena phakathi kwesikhathi esinzima angalulahli ukholo lwakhe, ngumlingiswa ome phezu kokholo lwakhe ngobuqotho, ithemba lakhe aliguquki, lokhu kumveza engumlingiswa oqotho, ongalahli ithemba lakhe masinyane nje.
Ngowesifazana olobuntu kungakhathalekile ubunzima adlula phakathi kwabo lalapho umyeni wakhe esethethwe ngabomthetho kasizwa lutho olulokhophe ngaye. Uqhubeka engowesifazana onakekela abantwana bakhe, elokhu ekhumbula njalo langomyeni wakhe owavalelwa entolongweni, umdeni wakhe uzama ngazo indlela ukuthi awugcine undawonye, lokhu kumveza engumlingiswa olothando njalo olesifiso sokwakha.
UMaMoyo ngowesifazana oloxolo, uyaxolela ngothando. Lokhu sikubona lapho umalukazana wakhe unkosikazi kaSidingani esegile imikhuba engahloniphi umuzi ngokungenisa isotsha elingumngane womkakhe phakathi kweguma. Lapho oDingilizwe sebeqome ukumjezisa yena uyalabhela ecelela umalukazana wakhe uxolo engelandaba lokuthi umonile, umnika ithuba lesibili empilweni ngelithi ngumntanakhe.
Inhliziyo exolela kangaka imveza njalo engumuntu olesibindi, sengathi uthi yena sedlule phakathi kwezehlakalo ezinzima kakhulu ngakho ukulwa akulamvuzo njalo akwakhi. Ngumlingiswa ogcwele inhlakanipho onanzelela isimo esinje, asibambe ngendlela uMaMoyo enza ngayo.
Lokhu kumveza njalo engumlingiswa ongela bandlululo, kalakuthi lo ngumalukazana, owami umntwana ngumfana, bonke ngabantwabakhe ngothando.
