Online Reporter
Ugwalo: Emfuleni Wezinyembezi olwalotshwa ngu eEzekiel S. K Hleza
Ophezulu Stinta
Siqhubeka ngokukhangela abalingiswa bogwalo lwethu abamqoka. Okuyibo esithi ngabahambisa ugwalo lwethu. USipinoza ngomunye wabalingiswa abamqoka.
Ngumlingiswa owayeqeqetshe kwavuma lapho kukhangelwa ngezempi, wayenguchwephetshe owayesilwa impi ngengqondo ayilwe njalo ngesigwagwagwa.
Simbona ebizwa enkundleni isitshisa, ibhunu lihlasele, wayivula ibhazuka yaqoqoda ibhunu lasala lingumlotha phansi.
Babesazi ukuthi lapho ebizwa wayengena, wayethanyela, abuye ke omunye wakhe uMgandane esezoqedisa ngeBazooka.
Yindoda eyayithi lapho impi isitshisa yayifika kusigaba sokubeka phansi umbhobho idle amathambo engqondo, yayibopha amaqhinga akhaliphileyo okulwa impi kungela mbhobho ewuphetheyo esandleni.
Sikubona lapho abanye bebutho lakhe sekumele bathwalwe ngendizamtshina sebethunjiwe ukuze isitha siyethola imfihlo yonke qede sitshaye sichithe labo njalo bafe ngendlela ebuhlungu.
USipinoza njengomlingiswa olobuchopho obubukhali wenelisa ukudobha udlebe lwendlela oMgandane ababezathwalwa ngayo.
Ngokuphazima kwelihlo wayesengenile emawofisini esitha engabonwa, ilwa licatsha mpela, akukho loyedwa owananzelelayo ukuthi kwasekule mpethu enkundleni yamabhunu.
Ngokuphazima kwelihlo nguye owayesengumtshayeli wendizamtshina eyayizathwala oMgandane, pho yayingabe isaya ngaphi ngaphandle kokuthi iqonde lapho ayikhomba khona ukuze kusile abafo.
Wayekubone kungcono engakasukumi ukuthi kwakumele kutshabalale laleyo ndizamtshina kulokuthi abafo bayewela esandleni sombulali, esandleni sesitha.
Yingqondo ekhaliphileyo eyomuntu olesibindi njalo ukuthi lanxa ebona umumo usunzima akadeli, uhambela phezulu acabange ngokuphazima kwelihlo, adobhe elinye iqhinga ukuze umumo ungahambi ngokubi.
Kuthi lalapho ephakathi komhlangano omkhulu wamabhunu uzifihla ngendlela zonke ukuthi kungabikhona nje loyedwa ocabangelayo ukuthi kungaba lomuntu oyimpimpi.
Ngumlingiswa oyimpendulo phakathi kobunzima, abanye bakhe babemethemba ukuthi loba kungathiwa sekunzima kangakanani babelakho ukuba lenhlasana yokusinda kuphela uSipinoza esaphila esidla amabele phakathi kwabo.
Ngumlingiswa olothando lwabafowabo abahlanganiswa ndawonye yimpi, kafikelwa ngitsho ngumcabango wokuthi asibo bafowabo begazi ukuthi sengaze athengise ngempilo yakhe ngabo.
Ufaka eyakhe impilo engcupheni ukuze kusinde abafowabo uthando olumangalisayo olwenza loMgandane ehlise izinyembezi esebona ukuthi nguye umtshayeli wendizamtshina abasebethunjwe ngayo.
