Online Reporter
Ugwalo: Emfuleni Wezinyembezi olwalotshwa ngu Ezekiel Mkhize
Ophezulu Stinta
Ngeviki edlulileyo siqale ukuxoxa ngendikimba zogwalo lwethu. Okunanzelelekayo ngaphezu kwezindikimba zonke esingaxoxa ngazo yikuthi kulendikimba eyodwa emqoka eyiyo edala kumbe ezala ezinengi nengi esihlangana lazo.
Indikimba yempi yiyo emqoka kulolugwalo, sikhuluma ngezinyembezi ezigeleza imihla lamalanga, zehliswa ngabantu abacitsha imphefumulo yabanye abantu kungabi ndaba zalutho.
Igama lempi yileli eliqukethe impendulo ethi umhlabathi wabansundu usegazini ukuze utholakale kumele kuchitheke igazi, okuyimpendulo ebuhlungu okwamagama okumele kuchitheke khona igazi kuphume imiphefumulo ukuze kutholakale umhlabathi.
Kuligama lempi njalo esilibona lihlakaza imdeni, abantu bethumbu linye bahlakazeke behlukaniswe phakathi ngokuthi omunye uphakamisa uhlangothi luphi. Bavele nje bavukelane kungabindabazalutho langesibongo esifanayo esibahlanganisayo njengalokhu okwenzakala ebantwaneni bakaMlandu, amadodana akhe ehlukaniswa luhlangothi lwempi bahle babe yingwe lenja, okudabukisa umphefumulo wabazali laba bantwana.
Ukuchitheka kwezakhiwo ezifana lezikolo, umsebenzi owawakhiwe ngobuciko bonke ngenjongo yokuthuthukisa impilo zabasakhulayo kudilizelwa phansi ngamandla empi kungabindabazalutho ngenjongo ebihlosiwe, yibubi bempi lobu bonke, sinanzelela ukuthi ayihambisani lengqubekela phambili etholakala imile ngaleso sikhathi iyabhidliza kuze qalwa phansi mhlazana yaphelayo. Ilendleko eziphezulu kakhulu impi.
Ekulweni lapha kudingeka izikhali ezilohlonzi ezingasoze zidonsele phansi loba yiluphi uhlangothi kusobala nje ukuthi ingqubekela phambili yonke nje iyema ngesikhathi sempi, umnotho wonke wesizwe ukhangelane lokondliwa kwezikhali. Usizi olukhulu asibo bonke abahlangabezana lezithelo ezinhle zempi, loba kuthiwa yimpi yenkululeko.
Indikimba yobugebengu siyibona idaleka isakhela njalo emuntwini. Mihla lamalanga kwakumele amadoda afana loSpinoza laboMgandane bahlale bebopha amaqhinga awokunqoba, kuyikuyikunqoba ngokubulala kuphela, kukanti lakuhlangothi lwabelungu, amasotsha akhona lawo ayehlala nje phezu kwamaqhinga lokhu kuyisimo esithumba isimo somqondo womuntu abalekelwe yikucabanga izinto ezimsulwa, abantu bonke nje jikelele ababephatheka empini babebalekelwa ngumqondo lobuntu obucwebileyo. Kuyabongeka nje ukuthi amajaha afana labo Mgandane babeqhubeka bemazi umuntu omdala bemhlonipha labo abadala baze bakunanzelele ukuthi babengabantu abalobuntu kungakhathalekile umumo ababedlula kiwo.
