Online Reporter
Ugwalo: Emfuleni Wezinyembezi olwalotshwa ngu Ezekiel S. K Hleza
Ophezulu Stinta
Ngeviki edlulileyo besixoxa ngendikimba zogwalo lapho esinanzelele kakhulu indikimba emqoka egwalweni lapha indikimba yempi eyiyona equkethe izingatsha zendikimba esihlangana lazo. Egwalweni lapha siyananzelela njalo indikimba yemfundo. Kwakuyisikhathi sempi yebo kuliwa kulwelwa umhlabathi wabansundu kodwa sihlangana labantwana besiya funda ezikolo.
Siyananzelela ukuthi langesikhathi uMalandu kanye loMasuku bebotshiwe besentolongweni, isikhathi semuli sasingamanga kwafika isikhathi sokuthi abantwana baqhubeke ngezifundo zabo lakanye kwabanjalo ngoDelimpilo kanye loSehlulizizwe bahamba labanye abantwana ukuyaqala izifundo zesigaba sokuqala ebangeni lemfundo yaphezulu.
Lokhu kuyagcizelela ukuthi loba oyise basebethunjwe ngumumo bavalelwa entolongweni, izifundo kwakumele ziqhubekele phambili yikho sibabona besiyabhalisa ukuqhubeka ngezifundo. Imfundo luhlelo olwaluphakanyiswa kanye langabogatsha lwezenkolo, lokhu sikunanzelela lapho umfundisi weManama ebahambela emakhaya abo esiyaxoxisana labonina ngokuncediswa kwabantwana ezifundweni zabo, kanye lokusekela nje imuli jikelele.
Sithola abafundi besikolo seManama lapho okwakufunda khona uDelimpilo lapho esihlangana labo bexoxa ngayo impi le kanye lendumela zabo besesikolo. Ukunanzelela abafana laba betshisa ingxoxo yempi besendaweni yesikolo kusobala yayivele isitshisa kodwa ke abazali babesazi okwakulungele abantwana babo kwakuyikuthi bayethola imfundo ezikolo.
Siyambona uDelimpilo esehlamuka efulathela isikolo lesi esengoqonda empini elandela abafo. Siyambona lo Sinqobizizwe ebuza umnewabo ukuthi kambe wahlamuka isikolo efulathela kanye lonina wayesengenwe yini. Lokhu kuyasibonisa ukuthi impilo yayililifa layo phezu kwemfundo, kungakhathalekile umumo owawukhona imfundo yayiqakathekile abantwana babehanjiswa esikolo, njalo kumele bafunde.
Ngempela imfundo layizolo ibivele iyisiqokoqela sempilo yikho nje abantwana bebehamba esikolo kungakhathalekile umumo kunengi okwakukhangelelwe ukuthi kuphume esikolo ezifundweni zabantwana, ikusasa labo lalivele liqukethwe yimfundo njengoba lalamuhla imfundo ilokhu iqakathekile. Abazali bonke babekhala ngokuthi abantwana bahambe esikolo lalapho izimali zokubabhadalela zingahlangani kwakuzanywa ngazo zonke indlela ukuthi abantwana bahambe esikolo bayethola izifundo besenzela ikusasa.
