Online Reporter
Ugwalo: Umendo
Olwalotshwa nguBarbara Makhalisa
ISAHLUKO 1
Sihlangana loMaZulu uyisekazi kaNdaba ongumntanomnewabo amfundisa waze waqeda wasebenza koBulawayo. UNdaba uthethe uGugu Dube, bazala abantwana ababili, intombi lejaha ababizwa ngo Sipho loNdumiso.
Sithola uMaZulu ephakathi kokuchola ngembokodo. Uyazidla ecabanga ngoNdaba amgcinayo, emva kokumgcina kanje wayasebenza koBulawayo. UNdaba sithola etshiya imuli yakhe loyisekazi ekhaya. Kukhanya akasathumeli njengakuqala okunga yikuthi useyilibele imuli yakhe. Osepa, izigqoko, imali kanye lokudla uyakunanzelela uMaZulu ukuba akusezi ngendlela. Ucabanga ukuba umalokazana wakhe ongu Gugu , uMaDube uyamfihlela konke lokhu. Akacabangi ukuba kungabe kudalwa nguNdaba ngokungathumezi. Uyazimisela ukuba ambuze umalokazana wakhe kube kanye.
Ngalelolanga sibona uGugu efika evela emfuleni ebelethe uNdumiso kuthi uSipho abe ngolandela unina ngemuva ethwele amanzana asephelele ezigqokweni. Ufikela phezu kukayisekazi omcela ukuba aze bakhulume. Indlela ambiza ngayo yacaca ukuba kukhona okufanele kukhulunywe. UMaZulu uyambuza- ke uGugu ukuba umkakhe wacina nini ukumlobela incwadi. Kuyavela ukuba uNdaba wayeselamaviki ayisikhombisa engaziwa langencwadi. Lokhu akazange wakukholwa uMaZulu. UGugu wazama ukuchasisa kodwa kwavuka olunye uthuthuva ngoba eseveze ukuba uNdaba wayethembise ukumthumela imali yokuba basuke ekhaya bayehlala bonke lomkakhe eMpopoma nanku wayesethenge indlu khona.
Kwabalengxabano lapha uMaZulu ekusola ukuba uzasala yedwa ekhaya lokhu engelayo inzalo, kanti ubeselethemba lokuphilisana lomntanomnewabo uNdaba lenkosikazi yakhe kanye labantwana. UMaZulu uyakuveza ukuba yena ngokwenda akuvumi ukuba umkakhe uMpofu osebenza emgodini ondle imuli kaNdaba osesebenza emawofisini ehola imali ephindwe kathathu kwekaMpofu.
Lanxa uGugu wayengakulindelanga ukuxoxisana kanje loyisekazi wamenza waphaphama ebuthongweni ayekade ephakathi kwabo. Ingxabano emazwini loyisekazi yenza uGugu waphelelwa lulwazi. Lanxa wazama ukuxolisa kodwa uMaZulu wayesevele waquma ukuba kuzafanela abelikhanda elizibonelayo. Wakubeka kwacaca ukuba owakhe umlandu wokondla uNdaba wawenza. Manje sekufanele labo baziphandele, bekele ukweyama kuye lemuli yakhe yonke. UGugu usala edidekile ephakathi komcabango kuze kutshone ilanga engananzelelanga ukuba izingane zifuna ukudla kwakusihlwa.
OKUVUKAYO
a) UGugu uvezwa engumlingiswa onjani kulesisahluko?
b) UMaZulu njengesihlobo salaba ababili uNdaba loGugu, uvezwe engumuntu onjani kwabathatheneyo.
c) UNdaba uhle aziveze ubuntu bakhe. Xoxa
d) Ukweyama emuntwini kubuhlungu njalo kunzima. Xoxa.
