Online Reporter
Ugwalo: Emfuleni wezinyembezi olwalotshwa nguEzekiel S K Hleza
Ophezulu Stinta
SIQHUBEKA logwalo lwethu oluthulula izinyembezi zigeleze zibe yimifula emangalisayo. Ngeviki edluleyo sitshiye amabutho eselande uMaMoyo emzini wakhe, wayevele nje wala wagomela ukuthi yena ayebukela igazi lakhe lisifa ngendlela ebuhlungu kangaka.
Zafika-ke izithunywa zebutho ezazingaphozisi amaseko lapho sekumele kuphuthunywe owayekhangelwa ngelesephula mthetho. Bamfica eguqile ethandaza, edumisa uMdali wakhe njengoba kuyilo nje ithemba ayesesele lalo empilweni yakhe.
Kubuhlungu kakhulu ukubona abazali befela izono zabantwana kumbe bejeziswa bejeziselwa zona zenzo zabantwana lezo abangela mandla phezu kwakho. Kambe kuqondile na, kulungile na, kumbe kuthiwa ngabazali abathuma abantwana bagile imikhuba kodwa ngokuqhubeka kogwalo siyananzelela ukuthi loMaMoyo lo wayengazange athume umntanakhe ukwenza into enje, khona lokuthi angene indaba zombangazwe.
UNdlela lo kahloniphi ngitsho umuntu olingana lonina omzalayo, aze afike kusigaba sokumfaka isandla lapho ekhulula impama isale ibhale kanye lasesihlathini. Umuntu omdala aze ahlengezele inyembezi, akhafule igazi ngamlomo. Kambe zivelaphi izibusiso esigabeni esinje, kungasikho lokuthi umuntu uyedlula nxa kunje kumbe azidonsele amanzi ngomsebe.
Wayengathi imihlolo yosuku ayikeneli okaMoyo, lapho engena emoteni yamapholisa watshayisana loSidingani akakho owakhulumisa omunye, bobabili kwasekumele nje benze sengathi abazani. Kwakubuhlungu kuhela ethunjini elazala, lalala uSidingani, bobabili sebesehlukaniswe ngumbangazwe.
Besanda kufika nje kwafika imota ezazithwele iqembu likaDingilizwe, izidumbu lezo zalethwa ebantwini ukuze baboniswe ngempela ukuthi igandanga lenziwani lapha ekhaya.
Abantu baziswa ngokuza kwesiphathamandla esikhulu esivela edolobheni laseHarare esasilanda ukuzabona umsebenzi omkhulu owenziwe libutho, omkhulu lo wayesebenzela kwemoyeni eziphaphayo, kuthiwa ngu Air Marshal kusobala-ke ukuthi kwakungumhlangano omkhulu owawubizelwe isiphathamandla esikhulu kangaka.
Kusenjalo nje yathutsha indizamtshina yazulazula emakhanda abantu, bethuka baphosa bawela phansi, wayiqondisa umtshayeli wayo yahlala phansi okwenyoni. Sehla isiphathamandla lesi esikhulu, sasihamba lomtshayeli omhlophe kanye lomsekeli kamtshayeli yena-ke owaye ngonsundu.
