Online Reporter
Ophezulu Stinta
Siqhubeka ngokukhangela abalingiswa bethu abamqoka egwalweni lapha. Ngeviki edlulileyo besixoxa ngomlingiswa wethu omqoka uSpinoza, umlingiswa okhaliphe okwamagama owayesilwa impi ngobuchopho bengqondo. USpinoza sinanzelela ukuthi izikhathi ezinengi wayesebenza ndawonye loMgandane, babenga bafo ke labo kwezempi. UMgandane wayeyisilo seganga, wayelisotsha lesizwe elalihlele laphelelisa ukuthi lizalwela isizwe sabansundu baze bawuthole umhlabathi wabo.
Yindoda eyayilesibindi esesabekayo engazange ivume ukwethuselwa ngabamhlophe kungakhathalekile ukuthi impi yayisitshisa kangakanani kweleMapate lapho sebethengiswe nguSikhonzimali owayesazi mqotho ukuthi lapho ababe catshe khona kazange afikelwe ngumqondo wokubaleka kodwa waqinisa iqembu lakhe wahlela amaqhinga wonke awokubhekana lesitha loba bona babesilwa ngezikhali zaphansi kungekho usekelo lwemoyeni.
Wayikhuza impi ibutho labamhlophe lakhonza labaphansi ngokuphazima kwelihlo. Lokhu kusivezela ukuthi uMgandane lo yindoda eyayiqeqetshile okwamagama kwezempi njalo ilesibindi ngoba singekho wayengeke ame abhekane lebhubesi emehlweni bevele bona behlaselwe ngabantu abanengi bebalutshwane, behlaselwa ngabantu abahamba ngenqola zomlilo bona bedabula amagusu ngezimbili abadabuka lazo bezalwa.
Kazange ahlehlele emuva loba impi isitshisa bhe, ngumlingiswa otshiswa njalo eholwa yikuphelelisa inhloso kanye lenjongo ehleliweyo. Abanye abantu bangabona sekunzima, sebekhulelwa ngumumo bayadela, babaleke, baphelelwe langamandla kodwa ke lokhu asikuboni kusenzakala ngoMgandane.
Kuba lesikhathi lapho uMgandane athunjwa ngaso ethunjwa libutho labamhlophe. Kasimboni exhamanda eziluma ulimi ngokwethuka. Omunye umlingiswa ngokunanzelela ukuthi sesezandleni zabathumbi wayelakho ukuhle akhuphe konke okusesifubeni ekhangelelwe ukuthi mhlawumbe angaxolelwa kuntambo yokufa asebhekene layo, ngoba osezandleni zabathumbi vele uyabe esebhekane lentambo yokufa.
UMgandane uthula zwi ngelokugcina imfihlo, ngumlingiswa owayesazi ukuthi imfihlo yohlangothi lwakhe yimfa layo kungakhathalekile ukuthi kuyini umuntu ayabe sehlangane lakho. Wayethembekile sibona lalapho kunzima abeqembu lakhe bafikelwa lusizi kodwa bayazi ukuthi yindoda emadodeni, loba uSpinoza wayesezama ngamandla wonke ukuthi bangafinyeleli esandleni somahluleli, isibindi wayesibambile okokuthi lesitha kasizange nje sidobhe lomoyana owawungalahlisa amaqhinga ayesebotshwa, egaywa nguSpinoza.
