Online Reporter
Ophezulu Stinta
Ngeviki edlulileyo besicubungula umlingiswa omqoka onguyena owayephethe impi, owayekhwaza ngensimbi yabelungu kuchitheke igazi, zilale ngoxolo izingane zabamhlophe.
NguMgandane lowo ongazange avume langaliphi ithuba ukuthengisa inotho yabansundu kungakhathalekile ubunzima ayesevuka ephakathi kwabo, ngumlingiswa oliqhawe ke loMgandane wayebambisana lendodana kaMalandu loMaMoyo ke, uDingilizwe.
Ngegama alethiwa ezalwa sinanzelela ukuthi igama lomuntu lalo lilokutsho okuthile, lichaza okunengi. Uyise laye emetha leligama wayengazi ukuthi ngelinye ilanga uzaphuma ayolidinga ngempela aphenduke lalo eliphethe ngezandla zombili.
Ngelinye lamaqhawe ke lalo leli elaphuma ngenhloso langenjongo alizange lilahle isinqumo segama laso. Kwakuthi lalapho unina ekhala ezigiqa ngelithi kaphenduke ekhaya kazange athinteke kodwa okwasekubusa engqondweni yakhe yikukhulula isizwe sabaNsundu.
Ngumlingiswa owayelesibindi okwamagama. Wayengaphong’ ukwethuka nje. UDingilizwe lo asomuntu owayephonguthatheka lomoya, ngumlingiswa owayezothile.
UDingilizwe wayehluke kakhulu kumfowabo uSibangani. UDingilizwe lo wayengumntwana ohloniphayo, sinanzelela lokhu lapha ehlangana labadala ehlathini kanye nje laphakathi kwemizi lapha wayetshengisa isimilo sakhe, wayengadeleli kukanti lenhlonipho wayelayo.
Lapho impi sebe yinqobile, asimboni ezitshaya isifuba phambi komphakathi mhlawumbe ngelithi abantu babone ukuthi yibo kanye amaqhawe qhawe alwa impi, uqhubeka ngelokuzithoba etshengisa ukuthi abadala ngabadala, kukhulunywa labo ngokuzithoba.
Yikho nje bebakhulumisa ngelithi ingqobe isisalele bona abadala laba ukuthi bakhethe kahle onguye osezakuba ngumkhokheli wabo ozabahola ngendlela eqondileyo, asibaboni kusiba yibo abahamba phambili ukukhethela abantu umholi kumbe umbusi njengabantu abalolwazi olungcono, njalo oluphezulu ngokuliwa kwezempi.
Ngumlingiswa oyaziyo eyakhe indawo empilweni, okuyisifundo esimqoka okwamagama ukuthi kuqakathekile ukuthi umuntu wonke azi umngcele wakhe empilweni ukuze inhlelo ziqhubeke kuhle njalo abantu labo baphilisane ngokuthula.
UDingilizwe loba wayephakathi kobunzima bempi wayelalo uthando kubafowabo ngoba wazama ukukhulumisana loSidingani ezama ukumbonisa ukuthi indlela le ayeyikhethile kwakungaso ndlela eqondileyo loba ekucineni kufika ekuthini kumele athathe isinqumo esijulileyo kwabanye esingaveza ukusweleka kothando.
