Online Reporter
Ugwalo: Umdumo wenkondlo elalotshwa ngu N.S Sigogo labanye
Inkondlo: Yeka Inzondo
Eyalotshwa ngu M M Sibanda
Ophezulu Stinta
Okumunyethweyo
Enkondlweni le, imbongi iyakhuza ngelithi abantu abayekele inzondo. Imbongi ibabaza amandla enzondo lokuthi nje vele yona iyisidalwa bani esilamandla amakhlu kangaka. Inzondo le yangena ithule zwi kungelamuntu oyinakayo, yekelelwa yakhula, yanakekelwa yakhuliswa.
Kuyisimanga nje lokuthi kambe onguye owayikhulisayo eyitshayela ihlombe wakhokha izigidi ezingakanani ekhokhela yona inzondo le ethi lapho ithuluka yafaniswa lomhlambi kazamcolo, ibhidliza kungasali lutho olumileyo.
Kusobala mkhulu okwamagama umonakalo owenziwa yinzondo iyasibhidliza isizwe ngamandla amakhulu.
Kodw’ inganani inkokhel eyahlawula leso sichaka?
Lokho phela yathululwa njezihlambi, zikazamcolo oqhilikisa izindonga zemifula
Zikazamcolo oqhilikisa izindonga zemifula
Ngempela inzondo ayilanto enhle, imbongi layo, ixaka layo imbongi ngokwayo ngoba impumela yayo ibuhlungu okwamagama, inzima ngempela ithwelwe ubuhlungu obufaniswa lokuthelwa ngenkovu etshisayo ebusweni.
Lalapho imbongi izama ukubala lokukhangelisisa ubuhlungu kanye lezibavu ezidalwa ngumona ebantwini, ubuhlungu bakhona abubaleki, abufundeki buyesabeka.
Ikhub’ miphefumulo emingaki linto?
Ebathel’ inkovu emehlweni.
Zingaki izinhliziyo ezivova igazi, Ziphiselwe ngemicibitshol’ evuthayo.
Imbongi iyamangala, ibuye njalo inkeme ukuthi kambe basekhona abantu abaphakamisa uxolo, ngalindaba na, indaba yenzondano, babekhona abathola ukuhleka, loba nje kungabe kuyisiqiniseko sabadala basendulo esithi, izolo liyenjelwa.
Ukuthi izinhlungu zonke zayizolo ziyalitshalwa kukhohlwe ngazo. Inkuthazo yembongi ithi yona abantu kabahlakaniphe, bavule amehlo ukuze bangagaluli kuyo inzondano le, ibakhukhulele kude.
Amehlo kahlahlwe, izindlebe zificwe ngengcotho, kumiwe ngentaba
Lapha isixwayiso sokuvula amehlo ngesokuthi abantu babone ububi obenziwa yinzondo ukuze bathinteke mpela ukuthi zimbi kakhulu izenzo kanye lemisebenzi yenzondo.
Idl’ okuhle kwezwe sengani vele yisabelo say’ esifaneleyo qho.
Idle yesulele phansi njenkukhu, idle sengani yinhlaba yenkangal’ ekhula yodwa.
Yinzondo yonke, ebhidlizayo, ephephuluzayo, ibuye njalo ithanyele konke okuyimpilo kanye lethemba labaphilayo osekuthatha ubuchopho obuhlakaniphileyo okwamagama ukuthi bunanzelele amandla enzondo lawo mandla avikwe angayekelwa emamatheka ngoba isiphetho sawo sibuhlungu.
