Online Reporter
ABAFUNDA ibhayibhilini, ngithemba bazavumelana lami ukuthi kulombhalo othi ngensuku zokucina izizwe zizavukelana, nanku lamhlanje siyakubona kubomakhelwane bethu elizweni laseNingizimu Africa.
Umuntu omnyama uhlukumeza omunye umuntu omnyama, babakhomba indlela bathi kabathwale imitshaqana yabo babhekise amabombo lapho abavela khona.
Bayakhohlwa ukuthi kusasa kuyizolo, ngikhumbula ngesikhathi kusalwelwa inkululeko banengi abantu ababebaleka eNingizimu Africa bezocatsha kwelakithi ikakhulu emhlubulweni wakithi eseduze lemingcele. Ngikhumbula ngesikhathi sempi ukhona omunye owayevela elizweni leNingizimu Africa ngoba bona babelobudlelwano labeZipra wayelimele welatshwa ngukhulu ozala ubaba ngezihlahla waze waphola engazange abonwe ngamabhunu. Wabuya esezothathwa ngabanye bakhe.
Ngiqale ngisathi nxa besithi abafuni zizalwane zakwamanye amazwe ezingela maphepha aqondileyo ngakuzwisisa lokho kodwa nxa sebesithi wonke umuntu ongasi sizalwane sakulelo kumbe ulelungelo lokuba khonale kasuke ngidinga ngiswele ukuthi sebengenwe yini abantu beMzansi phela lebhayibhili incwadi engcwele ekaMvelingqangi iyasikhuthaza ukuthi sithande omakhelwane bethu njengoba sizithanda phela kwazibani mhlawumbe kusasa zijike izinto besokusiba yibo abafuna uncedo kulabobantu akade bebasusela amanqe.
Yikho ngisithi kini bantu baseMzansi umoya phansi lingalwi ngoba induku ayiwakhi umuzi, ukulwa labomakhelwane kutshengisa ukuswela ubuntu. Into okumele libeyazi yikuthi izizalwane zeZimbabwe zifundile ngobunengi bazo njalo ziyawubhensela umsebenzi onzima. Ikhangelisiseni lindaba ngoba kusasa lizakhala ezimathonsi.
Ayixabene.
