Online Reporter
Ugwalo: Umdumo Wezinkondlo elalotshwa ngu NS Sigogo labanye.
Inkondlo: Izibongo zeqhawe eyalotshwa ngu NJ Tfwala
Ophezulu Stinta
Ukusetshenziswa kolimi
Imbongi enkondlweni yayo isebenzise ulimi oluhlabusayo okwamagama ukuze inkondlo yayo igeleze kamnandi isipha njalo lomfanekiso waleli qhawe ukuthi laliyindoda ekhangeleka njani.
Isibabazo
Imbongi isebenzise isibabazo enkondlweni, kokulandelayo,
Umaziphosel ephukele!
Wemagalela agadle!
Liqhawe qho!
Ligwaza qho!
Ngokusebenzisa isibabazo imbongi ngempela ibi babaza izimanga kanye lezenzo zeqhawe leli. Ukuphosa kweqhawe leli umkhonto kuyamangalisa, lapho eliphose khona kalikhuthi, liyagadla.
Isifaniso
Wawajuja amadoda, okophondo lukabhejane.
Isifaniso lesi sigcizelela indlela, kanye lekhono elimangalisayo iqhawe leli eliwuphosa ngakhona umkhonto lo, abalwaziyo uphondo luka bhejane nxa esilwa balawo umfanekiso wendlela ahlaba
ngayo kakhuthi uqonda ngqo ajuje kophe igazi. Iqhawe vele kumele ligwaze lingakhuthi. Kulapho okuvela khona ubuqhawe buphumele gcekeni.
Umfanekiso
Kusiqendu setshumi, imbongi iveze indlela imbongi evunule ngayo, lalapho umuntu engabe ezibuza ukuthi iqhawe leli lona vele libonakala njani, ngendlela okuvela ngakhona imvunulo umuntu
uyabona ngomfanekiso wengqondo ukuthi iqhawe leli vele likhangeleka njani.
Isigejo lemithika
Isidlodlo lezinsiba
Livunule laphelela
Injobo zezinsimba
Lensiba zezintshe.
Inhlonipho
Imbongi isebenzise ulimi oluhloniphayo, olungayangisiyo njalo lungatshiyi abantu benkeme umlomo wangaphansi.
Azinyel izithende amavaka.
Lokhu kugcizelela indlela iqhawe leli elalisesatshwa ngayo, amadoda angazithembanga, amagwala angakwazi ukumelana lempi babesuke nje bahle bazitshiye lapho lithutsha iqhawe leli bavele babaleke, kwakungelula ukuqondana lalo. Lokhu kusichazela ukuthi ngempela yayiyindoda emadodeni, iqhawe lamaqhawe.
Ihaba
Imbongi isebenzise ihaba elithi,
Wadlu muntu lomfowabo,
Lapha sikhangela sengathi indoda le iqhawe leli lidla abantu okwezimu. Okugcizelelwa yimbongi lapha, yikuthi iqhawe leli lalibula wonke umuntu lingakhethi ukuthi lo ngubani lalisidla ngomkhonto hatshi esikwejayeleyo okokudla umuntu abuye aginye sengathi udla isitshwala. Konke lokhu kubabaza indlela iqhawe leli elilwa libulale ngayo.
