Online Reporter
Ophezulu Stinta
Umdumo wezinkondlo
Inkondlo: Mfazi eyalotshwa nguM N Ngwenya
Okumunyethweyo
Inkondlo ikhuluma ngomuntu wesifazana othathwa ngowesilisa abengumkakhe. Umuntu wesifazana uyakwazi ukuthanda umuntu wesilisa ngothando olugcwele imfudumalo imbongi ewubona njengomlilo wothando lapho isithi: “Ngenxa yomhanguhangu womlilo wothando lwakho”.
Imbongi iyaveza njalo ukuthi owesilisa uyafulathela atshiye abakwabo anamathele kowesifazana. Ubuhle bomuntu wesifazana buyakhanga yikho nje owesilisa ethatheka ehamba laye kuze kufike esigabeni somtshado.
Isimo sowesifazana siyahuga, sibona lapho imbongi isithi ‘Lamehl’ anhlansi zikhangayo, lendebe zichinc’ uluju, lelizwi litshisa igazi.
Indoda iyathatheka lapho ihugwe yibuhle lobu. Amandla omuntu wesifazana ayamangalisa kakhulu kungakhathalekile ukuthi isilisa sikhuliswe ngothando lukamama, uthando, isisa lesandla esiqondileyo sikanina lapho sekufike owesifazana, indoda iyalibala konke ngonina iduhe lesifazana.
Kubuhlungu okwamagama lapho owesilisa esengobiza unina ngelomthakathi eselibele uthando lonke olusemuva oluyilo olumkhulise waze wafika lapho asekhona.
Abantu besifazana bayasetshenzelwa, ngoba bafuna izinto ezinengi. “Ngawela uNgulukudela ngithuthwe nguwe, Ngoba ufuna isigqoko, isihlangu, iqhiye lomceco”. Indoda isebenza nzima, isebenza gadalala ukuze yenelise ukutholela owesifazana zonke izidingo lezi ezifunakalayo.
Amadoda angena phakathi kobunzima lasezingozini ngenxa yokufuna ukusuthisa abesifazana kanye lokubajabulisa, ngempela isifazana silamandla, siyabusa.
“Izilwane zangi-hwihwitha, lezinyoka zaphosa zangigangada.” Lapho abesilisa sebenakekela abesifazana bona bayazilibala bazincitshe lokudla lokhu.
Phakathi kwamandla abesifazana lokuthandwa abakwenziwayo kuvuka ukungathembeki okuyinto edanisa okwamagama.
Lapho abesilisa sebephume badabula umhlaba ukuyabaselela bona basala besehlulwa nje yikubekezela lokuzibamba, owesifazana setholakala esegone usane olungaziwa ngumkakhe, owesilisa amkhethayo.
“Ngathola usane lukhala kwawakho amathangazi, usane ngingalwazi.” Sibona abesifazana beveza njalo ubuthakathi thize, lapho eselethe ingane engaziwayo egumeni lapha ukuze alalise udaba lwakhe owesifazana sedlisa indoda ukuze ilibale kokuphela ngamanyala enzakeleyo.
“Ngatshinga ngadl’ inja. Wangithambisa ngozwanamina, Ngalala ngaba ngumcaba.”
Phezu kwakho konke owesifazana ubuya abonakele ephethe emlonyeni lapha, kalakuthi kusemini kusebusuku, ukuhluma indoda ize iphelelwe ngamandla, ulimi lwakhe lulamandla adlula awendoda ngokwayo.
Ekucineni umfazi sevuka imvukuzane edla kancane kancane okuveza ukuthi indoda vele kayitshiyi iphila, usuka layo esandleni sothando ayifikise kwelakogoqwanyawo.
