Online Reporter
Umdumo Wezinkondlo iqoqo elalotshwa ngu NS Sigogo labanye
Ophezulu Stinta
Inkondlo: Umuntu lo eyalotshwa ngu EM Matshona
Ukusetshenziswa kolimi
Imbongi isebenzise ulimi oluhlabusayo enkondlweni le, lapho isebenzise:
Isingakethiso: lumuntu unjengobaba lomama kimi, ungifundise okunengi okwalaphe emhlabeni
Lapha imbongi ibigcizelela ukuqakatheka kombalisi lo odlala izinga lomzali yikho nje eze wamfanisa labazali, abazali ngabantu abaqakathekileyo empilweni, lokhu kuveza ukuqakatheka kwalo umbalisi ngokufanayo.
Isitsho: lob’ umhlaba wonke umkhangelela phansi, UNkulunkulu kambusise amuph’ unwele olude. Imbongi igcizelela ukuthi loba abantu bemeyisa umbalisi lo bengamenzi umuntu kodwa yena ulomkhuleko obanzi ngombalisi lo, uthandazela ukuthi uNkulunkulu amthele ngezibusiso ezinhle kakhulu okungaphezu kokweyiswa kwakhe ngumhlaba.
Ukwenzasamuntu: loba umhlaba wonke umkhangelela phansi.
Imbongi inikeze umhlaba izenzo kanye lamandla abantu ngoba lokhu kweyisa kuvame ukwenziwa ngabantu abalomcabango njalo lenjongo ethile. Lokhu kugcizelela ukuthi ngempela umbalisi weyisekile okwamagama.
Isifananiso: udubeka laye njengabazali bami.
Imbongi igcizelela ukuthi umbalisi udlala indima yabazali kumfundi wakhe, uyamfundisa abuye njalo adlale indima yobuzali, yokumqoqa imfake endleleni eqondileyo.
Abenjengogogo lobabamkhulu ekhaya lapha imbongi ifisela umbalisi impilo ende, ayilinganisa laleyo eyaphilwa ngo Adamu basendulo, amfisele njalo ende impilo elingana leyaphilwa ngobabamkhulu basendulo ababephila impilo ende okwamagama.
Ekubhaleni inkondlo le imbongi ibihlose ukuveza imsebenzi emangalisayo eyenziwa ngumbalisi. Umuntu olobuntu, okhulisa abantwana ngesineke langobuntu ayibo bona laye.
Kuyinjongo emqoka ukuthi nxa abafundi labo bengananzelela umsebezi omangalisa kangaka owenziwa ngumbalisi banganika ababalisi imbeko lesicoco esibafaneleyo babahloniphe njalo.
Okunye njalo imbongi ebikuqondise kubabalisi lapha, yikuthi bangaze bakhathazeka ngokukweyiswa abakwenziwa ngumhlaba, lokukhangelelwa phansi nje kodwa bona baqakathekise okuhle abakwenzayo, umsebenzi omuhle bangawulahli, ngoba kunengi okuhle abakuthweleyo kukhangelwa ikusasa yabafundi.
Yibo njalo ababalisi abakha isizwe, abakha umphakathi, Kukhuliswe ilizwe lesizwe sabamnyama, sibelodumo ngokuziphatha kwaso okuhle.
Imbongi iyafundisa lalabo abeyisa ababalisi ukuthi bake bahlole umsebenzi owenziwa ngababalisi ukuthi umangalisa njalo umkhulu kangakanani.
