Online Reporter
Umdumo Wezinkondlo: N. S Sigogo labanye
Inkondlo: Sengigugile ngofa elotshwe ngu A. Z Mazinyane.
Ophezulu Stinta, Okumunyethweyo
Imbongi ikhuluma ngokukhula kwayo isuka ebujaheni kuze kuyefika kusigaba sokuthi isigugile sikhangelele ukudlula emhlabeni.
Imbongi isakhula ingumfanyana layo yayihawukela ukukhula ibe lijaha njengomuntu wonke okhulayo uhawukela ukungena kusigaba esilandelayo layo imbongi yahawukela ukuba lijaha ngokuhamba kwesikhathi yaba lijaha isikhathi silokhu sihamba layo ihawukela ukuya phambili yakhula yaba ngubaba.
Kuthi ke esesigabeni sokuba ngubaba sekumele adlulele kusigaba sokuba lixhegu kuyaqala ukuqoqoda uvalo, kwaba lokuthikaza njalo kodwa ngenxa yokuthi isikhathi asiso somuntu siyaqhubeka siyaphambili layo yazibona isingena indlela yamaxhegu, isigugile.
Ngesikhathi oyise kanye labokhokho bayo imbongi beyilaya beyixwayisa ukuthi layo ngelinye ilanga izaguga yayilakho ukuthandabuza ngesigaba okusobala ukuthi wayengasithakazeleli ngoba silenhlungo lobunzima obungafani lasemuva.
Imbongi ifikelwa lusuku lokwamukela ukuthi ngempela isigugile ize inanzelele lobuqotho besaga esithi guga sithebe kade wacholela, sinanzelela lokuthi leso sithebe sayo asisacholeli lokucholela.
Iyakhalaza imbongi lapho ikhangela emuva inanzelela ukuthi yayilamandla amangalisayo isenelisa ukutshaya induku, yayisenelisa njalo ukutshaya imvokloklo okuzwayo kodwa lamuhla nxa sezikhangela sezibona engasela mazinyo iyakhumbula imbongi ukuthi ngesikhathi isengumfana yayikwazi ukuhamba kodwa lamuhla ayiselanyawo ayisenelisi ukuhamba.
Amehlo ayo asebona luvilibana okokuthi kayisabonisisi lasemehlweni ayo sihamba lango dondolo lapho isihamba ngenyawo ezintathu akusavumi ukuthi ihambe ngezayo ezimbili ezokuzalwa sokumele zincediswe lunyawo lwesithathu.
Imbongi isinanzelela ukuphela lokufiphala kwensuku zayo, amalanga ayo okuphila emhlabeni asemalutshwane kakhulu yikho nje esefanisa insuku zakhe lezophondo lwembuzi.
Imbongi isiziduduza ngokuthi loba nje insuku zayo seziphela sezifiphala igama lakhe lilotshiwe emhlabeni lapho azasuka khona libuye lilotshwe lalapho ayakhona.
Emhlabeni kuzasala kusaziwa ukuthi lapha kwakungumuzi kazibani bani kanye lesibongo sayo esiyosala labazukulu, yikho nje isitsho ukuthi igama layo lizoba yisikhonkwane kuzulu kutsho liyohlala kube nini, ngoba yena seguguile sezadlula emhlabeni ukudlula emhlabeni kuyikufa.
