adminYiNtatheli kaMthunywa
INHLANGANISO ezimele yodwa eyeZimbabwe Development Trust isikhuthaze abalimi ukuba bangalimi ebusika ngoba izilimo zabo zilakho ukuthi zitshe ngoba izulu lakhona lingasani ngendlela efaneleyo.
Abalimi bavame ukulahlekelwa yimali enengi ngenxa yokulima ebusika.
Endulo abalimi babevame ukulima ebusika ngakho nxa isikhathi sokuna kwezulu sesifikile izilimo zabo zazikhula kuhle kodwa khathesi izulu alisani kuhle ngenxa yokuguquka komumo womkhathi.
Ekhuluma loMthunywa uMnumzana Simon Spooner ongumqondisi wenhlanganiso le, uthe isikhathi sokuna kwezulu sesaguquka ngakho kubalulekile ukuba abalimi batshintshe indlela abalima ngayo ukuze bathole isivuno esihle.
“Empilweni yalamuhla kulabanye abalimi abalokhu belima ebusika besebenzisa indlela ebizwa ngokuthi yi-dry planting.
“Indlela le yayisebenza endulo hatshi khathesi. Umlimi engahlanyela ebusika nxa izulu lakuqala lingana inhlanyelo leyo ilakho ukumila kodwa izulu lakhona lilakho ukwekela ukuna.
“Izilimo lezo eziyabe sezimilile zilakho ukucina sezitshiswa yisikhudumezi zicine sezisifa. Abalimi kumele bengagijimeli ukuhlanyela nxa izulu lingana kodwa kumele beqale bemelele izulu ukuthi line okuzwayo ukuze bengadlalisi inhlanyelo yabo,” kulandisa uMnu Spooner.
Uthe abalimi kumele belime benanzelela ukuba zikhathi sezatshintsha ukwenzela ukuba bezitshayele inala.
“Abalimi nxa befuna ukuzitshayela inala kumele bevune amanzi ukuze benelise ukulima bethelezela,” kuphetha uMnu Spooner.
Online Reporter