admin
Cornelius Luphahla
IZAKHAMIZI zesigabeni seDaluka ngaphansi kukaSobhuku uSivelani Moyo eLupane sezitshengise ukuba zilengqondo yengqubekela phambili ngokusungula isivande sokulima imibhida.
Isivande lesi sibizwa ngokuthi yiSizimisele Garden njalo kulinywa imibhida, ihanyanisi kanye lamatamatisi kuthi ehlobo kulinywa umumbu.
UMthunywa ukhulumisane loNkosazana Molina Moyo umgcinisihlalo walesisivande wachaza ukuthi isivande lesi sasungulwa ngabesifazana ngenjongo yokuthuthukisa isigaba.
“Isivande sethu sasisungula singabesifazana bodwa ngakho sasesifaka abesilisa abalutshwana sisenzela ukuthi basincedise ikakhulu ekuvuseni ucingo nxa luthe lwawa.
“Njengabesifazana sikhangela kakhulu ukuthi ngabe isivande sethu siyaphumelela sincedise intandane ezitholakala esigabeni,” kubika uNkszn Moyo.
UMthunywa wenelise njalo ukuxoxa loNkosazana Ruth Mnkandla omunye wezakhamizi ezikulesisivande wachaza ukuthi uhlupho abahlangana lalo kulesisivande yikuswelakala kwamanzi.
“Ubunzima esihlangana labo kulesisivande yikuthi asilasibholane lapho esingathatha khona amanzi okuthelela imibhida yethu, lokhu kwenza ezinye izakhamizi zingalimi kulesisivande.
“Amanzi siwathatha emgodini owadilikayo ngakho kuyingozi ngoba umuntu engawela afe njengoba umgodi lo ungavalwanga njalo udilikela,” kutsho uNkszn Mnkandla.
Izakhamizi lezi zibikele intatheli ukuthi ucingo olukulesisivande zaluphiwa yinhlanganiso ethiwa yiChristian Care eyiyo eyenza zasungula iphurojekithi le.
UMthunywa yenelise njalo ukukhulumisana loNkosazana Angeline Khuphe waveza ukuthi izilimo zabo bazithengisela izakhamizi lababalisi.
“Imibhida yethu siyithengisela izakhamizi zakulesisigaba lababalisi kuthi enye siyithengisa ezitolo zeSt Luke’s kanye lesibhedlela.
“Isifiso sethu yikuthi ngabe uHulumende uyasincedisa asigebhele umgodi ukuze isivande sethu sithuthuke,” kuphetha uNkszn Khuphe.
Online Reporter