Online Reporter
Ethel Ncube
INGCITSHI kwezokulima sezixwayise abalimi ukuthi balime amakhabe bezitshayele imali.
UMnumzana Mduduzi Dube ongu-agronomist kunkampani ye-AgriSeeds ukhuthaze abalimi ukuthi balime amakhabe bezitshayele imali.
Uthe amakhabe avuma ngesikhathi sokutshisa.
“Amakhabe alinywa ngesikhathi sokutshisa kusukela ngenyanga kaNcwabakazi kusiyacina kuLwezi. Sikhuthaza abalimi ukuthi baqale ngokulungisa umhlabathi bengakafaki inhlanyelo yabo phansi.
“Abalimi kumele benze imibheda engaba yi-10cm ubude njalo imibheda le kumele ibe lezikhala ezingaba yi-1,2 kusiya ku-2m phakathi,” kutsho uMnu Dube.
Uqhubekele phambili esithi amakhabe ayatshiyana njalo lokuthi kumele alinywe emhlabathini onjani kuya ngokuthi yiwuphi umhlobo.
“Amakhabe kafuni kulinywa emhlabathini olivutshevutshe futhi ulobumunyu obuphakathi kwe-5, 8 kusiya ku-6, 2 njalo kumele elinywe emhlabathini ongena kuhle amanzi phansi.
Okunye njalo sikhuthaza abalimi ukuthi bevule izikhala eziyi-60 kusiya ku-90cm phakathi nxa behlanyela inhlanyelo yamakhabe,” kutsho uMnu Dube.
Uthe kulemihlobo yamakhabe agoqela i-Fahari F1 kanye le Baraka F1.
“I Fahara F1 ngumhlobo omnandi kakhulu njalo okhipha izithelo ezinkulu njalo ulombala obomvu kakhulu, phandle uluhlaza nje okukhanyayo.
“Okunye ngomhlobo we-Fahara F1 kayiphuzi ukukhula.
“I-baraka F1 ngumhlobo wekhabe omnandi njalo olombala oyi-dark green ngaphandle le-dark reddish phakathi, njalo ukhipha izithelo eziyi-2 kusiya ku-5 kusilimo esisodwa,” kutsho uMnu Dube.
Uthe ikhabe lithatha amaviki angu-11 kusiya kwangu-17 ukuze livuthwe.
“Ikhabe lithatha amaviki angu-17 ukuze livuthwe njalo sikhuthaza abalimi ukuthi nxa sebevuna bevune ekuseni ilanga lingakatshisi kakhulu, engatshiswa lilanga isikhathi eside bengawavuna bewafake endaweni elomthunzi,” kuphetha uMnu Dube.
