Online Reporter
Ethel Ncube
ISILIMO se-peas yisilimo esithandwa ngabantu abanengi njalo abalimi abangathola inzuzo enhle ngokusilima.
UMnumzana Elias Ndlovu ongumlimisi kunhlanganiso ye-Agritex ukhuthaze abalimi abafisa ukuzitshayela imali ngokulima i-peas ngendlela abangazilima ngayo ukuze bathole isivuno esiphezulu.
Uthe abalimi kumele baqale ngokulungisa izivande zabo bengakahlanyeli.
“Sikhuthaza abalimi ukuthi beqale ngokulungisa umhlabathi wabo ulingane besebefaka umquba ukuze nxa sebehlanyela isilimo sabo senze kuhle,” kutsho uMnu Ndlovu.
Uthe ukhuthaza abalimi ukuthi bayethenga inhlanyelo ye-peas ezitolo ezisemthethweni.
“I-peas ilemihlobo etshiyeneyo ethi i-mangetouts, sugarsnaps kanye le-shelling peas. Sikhuthaza abalimi ukuthi bathenge inhlanyelo yabo kumankampani asemthethweni ukuze bethole inhlanyelo eqondileyo,” kutsho uMnu Ndlovu.
“Sikhuthaza abalimi ukuthi bevule imizila nxa belima i-peas njalo begebhe amagodi angaba yi-2cm ukutshona. Inhlanyelo ye-peas ithatha amalanga angu-7 ukuze imile.
“Inhlanyelo ye-peas ayifuni manzi amanengi ngakho sikhuthaza abalimi ukuthi bengayitheleli kakhulu,” kutsho uMnu Ndlovu.
Uthe i-peas ilemikhuhlane yezibungu ezinengi njalo ukhuthaza abalimi ukuthi befafaze izilimo zabo ukuze zingacini zisifa.
“I-peas ilemikhuhlane egoqela i-powdery mildew, down mildew kanye le-blackspot. I-peas ihlaselwa yizibungu eziqoqela ama- aphids, thrips, bollworm kanye le-cut worm.
“Sikhuthaza abalimi ukuthi bafafaze izilimo zabo besebenzisa i-dimethiote 50ec, chlorphyrifos kanye le power pesticide ukuze kufe izibungu,” kuphetha uMnu Ndlovu.
