Online Reporter
Nkosilathi Sibanda
ABALIMI abathathela phezulu uhlelo lokulinywa kwegwayi esabelweni seMatabeleland North sebehlekelela nanko sebethola inzuzo esiguqula impilo zabo kwelingcono.
Isabelo lesi sibhekane lethemba elitsha kwezokulima njengoba ukulinywa kwegwayi sekukhula ngamandla ezigabeni zeMguza laseBubi.
Umqondisi we-Agricultural and Rural Development Advisory Services (Ardas) kulesi isabelo, uMnumzana Mkhunjulelwa Ndlovu, uthe isivuno segwayi siphezulu njalo siyaphumelela kakhulu ngoba abalimi sebeqalile ukubona inzuzo eqinileyo.
Uthe ukusetshenziswa kwamandla elanga ekomiseni igwayi sekwehlise ukuthembela emalahleni lenkuni njalo sekwandise lesivuno. Ubike njalo ukuthi isibaya esitsha sokomisa igwayi esakhiwe eKhami Prisons Farm kulindeleke ukuthi sikhuphule isilinganiso sokuhlanyelwa kwegwayi.
“Abalimi bethu basebenza nzima. Sebesithola isithelo somsebenzi wabo. Intengo abayitholayo emakethe iyabakhuthaza ukuthi baqhubekele phambili,” kutsho uMnu Ndlovu.
“Ukusebenzisa i-solar curing kulethe umehluko omkhulu. Kwehlisa indleko njalo kugcina imvelo. Sifuna ukubona abalimi abanengi besamukela ukulima igwayi ukuze sikhuphule inani lamahekitha lesivuno sesabelo sonke.”
Ugatsha lweLands, Agriculture, Fisheries, Water leRural Development kuHulumende, lubika ukuba okwamanje, amahekitha alikhulu letshumi lasikhombisa (117ha) asemhlabathini ohlanyelwe igwayi eMguza.
UMnu Ndlovu uthe ngaphandle kwegwayi, izilimo ezifana lamabele, uphoko lamazamabane ziyaphumelela.
Uveze ukuthi umkhuba wokuthatha ukulima njengebhizimusi usukhula ngamandla njalo uhambisana lombono weVision 2030 wokuguqula ilizwe libe lomnotho ophezulu.
