Online Reporter
Ethel Ncube
INGCITSHI kwezokulima sezixwayise abalimi bembhida ukuba akumelanga ilinywe nje kodwa kulendlela okumele bazilandele ukuze babe lenzuzo ephezulu.
UMnumzana Edward Chikwaya ongu-Agricultural Extension Officer kunhlanganiso yeZimbabwe Development Democracy Trust (ZDDT) ukhuthaze abalimi abafisa ukulima imbhida ye-chomolia ngendlela abangalima ngayo imihlobo etshiyeneyo yembhida le okungabenza babe lenzuzo.
Itshomoliya ilemihlobo emibili i-viscose le-African kale.
“Umhlobo we-African kale kawuhluphi ngitsho ukulima. Uyakhula ubeyi-30cm kusiya ku-45cm isiya phezulu,” kutsho uMnu Chikwaya.
Uthe inhlanyelo yetshomoliya lusaba kumbe amaxhakela okudingeka ukuba agxunyekwe esivandeni esifakwe umquba.
“Sikhuthaza abalimi ukuthi baqale bafake umquba ezivandeni zabo bengakahlanyeli inhlanyelo yosaba lwetshomoliya. Ngemva kwalokho kumele bathelele nsukuzonke usaba luze lumile.
“Ngemva kwamaviki amabili usaba lumilile sikhuthaza abalimi ukuthi bagxumeke amaxhakela lawa bevule imizila phakathi ukuze lukhule kuhle,” kutsho uMnu Chikwaya.
Uqhubekele phambili esithi umhlobo we-viscose lawo kawuhluphi ukulima
“Umhlobo we-viscose kawuhluphi ukulima njalo kawudingi manzi amanengi. Inhlanyelo yomhlobo lo, ngamaxhakela njalo uyakhula ube yi-1 metre ubude. Sikhuthaza abalimi ukuthi nxa behlanyela bevule izikhala eziyi-20cm phakathi,” kutsho uMnu Chikwaya.
Uthe itshomoliya kayihluphi ekukhuleni kwayo ngoba ilezibungu ezinlutshwana ezigoqela intwala njalo ukhuthaza abalimi ukuthi beyifafaze.
“I-chomolia ilezibungu ezinlutshwane ezigoqela intwala njalo sikhuthaza abalimi ukuthi befafaze imibhida yabo ngomuthi othiwa yi-Mathion 50e ukuze bebulale izibungu,” kuphetha uMnu Chikwaya.
