Online Reporter
Ethel Ncube
INGCITSHI kwezokulima sezixwayise abalimi ukuthi kulesi isigaba sokulima belime indlubu ngoba zilenzuzo emangalisayo.
UMnumzana Mduduzi Dube ongu-Agronomist kunkampani ye Agriseeds ukhuthaze abalimi ukuthi belime indlubu ngoba zilenzuzo emangalisayo. Uthe indlubu kazihluphi ukulima njalo ziyavuma endaweni ezitshiyeneyo.
“Indlubu kazihluphi ukulima njalo zilinywa kusukela ngenyanga kaLwezi kusiyacina kunyanga kaZibandlela. Endaweni ezilezulu elinengi sikhuthaza abalimi ukuthi beqalise ukulima ngoMpalakazi ukuze bevikele izilimo zabo emikhuhlaneni,” kutsho uMnu Dube.
Uqhubekele phambili esithi indlubu kazifuni kulinyelwa emhlabathini omanzi kakhulu.
“Sikhuthaza abalimi ukuthi belime indlubu zabo emahlabathini njalo olobumunyu obuphakathi kwe-6 kusiya ku-7 njalo kaziyenzi kuhle nxa zingalinyelwa emhlabathini omanzi kakhulu,” kutsho uMnu Dube.
Uthe ukhuthaza abalimi ukuthi benze imizila nxa sebehlanyela inhlanyelo yendlubu.
“Sikhuthaza abalimi ukuthi nxa behlanyela inhlanyelo yendlubu begebhe amagodi abeyi-3cm kusiya ku 4cm ukutshona njalo benze imizila bevule izikhala phakathi eziyi 30 kusiya ku 40cm ukuze indlubu zabo zingaminyani njalo zikhule kuhle,” kutsho uMnu Dube.
Uthe indlubu zilemikhuhlane lezibungu ezinengi njalo ukhuthaza abalimi ukuthi belime umhlobo ongaphangisi ukubanjwa yimikhuhlane.
“Sikhuthaza abalimi ukuthi nxa bengabona ezinye zezilimo zabo sezitshengisa impawu zomkhuhlane bezisiphune ukwenzela ukuthi kungagcwali insimu njalo sikhuthaza abalimi ukuthi bafafaze izilimo zabo ngomuthi okuthiwa yi-
Mancozeb ukuze babulale izibungu,” kuphetha uMnu Dube.
