Online Reporter
Ethel Ncube
INHLANGANISO yeZimbabwe National Family Planning Council yeMatabeleland South ibibuthanise omama beGwanda ibafundisa ngokuhlola imvukuzane kunanzwa iWomen’s Month ngeviki ephelileyo.
Amanina afundiswe ngokunanzelela izitshengiselo zalimvukuzane masinyane.
UNkosazana Onnie Mupunga ubike ukuba omama kumele bananzelele izitshengiselo zemvukuzane ukuze yelatshwe kusesemasinyane.
“Imvukuzane yebele kumele nxa ungasangeni esikhathini ube uzikhangela izitshengiselo kanye ngenyanga. Kulabo abangena esikhathini, isikhathi sokuthi ukhangele amabele akho kulapho usanda kuqeda esikhathini uhle uzihlole ngoba iqhubu lakhona nxa usanda kuqeda liyezwakala masinyane.
“Amabele nxa uwakhama ungabona ephuma igazi kumbe ubomvu kumele ugijimele esibhedlela uyethola usizo masinyane kodwa ungabona amabele ephuma amanzi angani aluchago akulankinga,” kubika uNkszn Mupunga.
Uqhubekele phambili eveza ukuba wonke umama kumele abekwazi ukuthi uhlola njani amabele akhe.
“Umama nxa ekhothama kumele amabele wonke womabili ehle njalo ungezwa elinye selingani selisinda kutsho sokulohlupho, hamba emtholampilo. Okunye bomama, nxa ukhangela amabele akho phakamisa isandla sakho ubambe ikhanda esiphundu. Kuthi nxa subambe ikhanda esinye isandla siqalele ekhwapheni ukubamba sisehla sibuya engonweni yebele, kumele isandla lapho esihamba khona uhambe usizwa ukuthi akulasigaqa yini. Ibele elilodwa ulikhangela ingxenye ezintathu uzwe ukuthi nxa ubamba akulasigaqa. Okunye bomama nxa uphakamisa izandla zonke phezulu kumele uzwe ukuthi amabele akho wonke ayaphakama yini nxa ungezwa elinye lingaphakami kutsho kulolutho oludonsela phansi, sokumele uye esibhedlela,” kuphetha uNkszn Mupunga.
