admin
Pumulani Mpofu – Sisakhula abadala babeqinisa ukuthi ingane zihlale zixoxa labadala abakwazi ngcono ngempilo abafana labogogo, obabamkhulu, obabakazi kanye labomalume ngoba laba yibo okulula ukuthi abantwana baxoxisane labo ukuze bazi ngempilo langokuphatha.
Abadala babeqinisa ukuthi ukungazi kufana lokufa ngoba bebona ukuthi wonke umuntu kumele elulekwe mayelana lempilo jikele. Babenanzelela ukuthi zinengi izinto ezenzakala empilweni ezingabangela ukuthi izingane ziduke ngenxa yokwesaba ukuxoxa labadala.
Babekuqinisa lokhu ngoba benanzelela ukuthi izikhathi zonke umuntu ongazi lutho uzifananela lomuntu osemnyameni. Lokhu kwakusenzelwa abantu ukuze bakhaliphe bajabulele ukufunda ukuze babe lolwazi olujulileyo.
Kuliviki ngithole ithuba lokuxoxisana lojaha oleminyaka elitshumi lambili okuthiwa nguSenzo.
USenzo watshiywa ngabazali bakhe esasemncinyane wasala egcinwa ngugogo ozala unina eKezi, wathi-ke lapho esemqotshwana weza edolobheni lakoBulawayo wazeqedisa izifundo zakhe kwesinye isikolo esiselokitshini leNkulumane.
USenzo njengomuntu okhaliphileyo waloba imhloliso yakhe ye Ordinary level waphumelela. Waba laso isifiso sokubana aqhubekele phambili kodwa wanqandwa yikuswela incwadi yokuzalwa lokhu ke kwadala ukubana acine sehlezi ngoba kungekho icebo lokubana athole leyoncwadi yokuzalwa ukuze aqhubeke phambili ngezifundo zakhe.
Ekuzweni kwakhe ngogatsha lweTrinity Project weza ezothola izeluleko zokubana engaphathiseka njani ukuze athole incwadi yakhe yokuzalwa kanye lesithupha njengoba esedlulise iminyaka elitshumi lasithupha.
Okokuqala kumele aye emapholiseni ukuze athole incwadi okuthiwa yi-missing persons report, eveza ukuthi unina wacatsha kaziwa ukuthi wayangaphi okwesibili kumele adinge isihlobo sikanina esilesithupha.
Ugogo wakhe nguye ke ozaqonda eKezi ayemdingela i-birth confirmation record kanye lencwadi yekilinika njengoba ikhadi lakhe selalahleka.
USenzo kuzamela aqonde emahofisini akoMsitheli ephethe i$5 ukuze athathe ama-fingerprints njalo aye esikolo lapho afunda khona ukuze bamuphe incwadi eveza sobala ukubana wafunda wazewaloba lemihloliso engelayo incwadi yokuzalwa.
Nxa konke lokhu sokutholakele kuzamele-ke aqonde eKezi ephethe i$2 kanye lezincwadi zonke ezibalulekileyo njalo lezihlobo zikanina ezizaphathisa ekumthathiseni incwadi yokuzalwa lesithupha.
Ngiloba nje uSenzo uphezu kokulungisa incwadi zakhe njalo thina njengogatsha olusekela kakhulu ukuthathwa kwencwadi zokuzalwa silethemba lokuthi uzaphumelela ekuthatheni incwadi yokuzalwa njalo aqhubekele phambili ngezifundo zakhe.
Asihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773165055 laku www.trinityproject.biz
Online Reporter