Nkosilathi Sibanda
IZIKOLO sezicetshiswe ukuthi ziqinise imizamo yokulwisa udlakela lokuhlukuluzwa kwabafundi, ngoba impumelelo kwezemfundo kumele ihambisane lokuhloniphana lokwakha ubuntu ebantwaneni.
Lokhu kukhulunywe ngusomabhizimusi olodumo kuleli, ophinda njalo abengumsekeli wenhlelo zemfundo uMnumzana Clemence Kunzekweguta, emkhosini wokunika abafundi beMahatshula Primary School abenze kuhle izicoco ngeviki edluleyo.
“Umsebenzi wokuqeda ukuhlukuluzwa kwabafundi awusiwo owababalisi labaphathi bezikolo kuphela, kodwa udinga ukubambisana kwabazali, abafundi lomuntu wonke ophatheka kwezoku-khuliswa kwabantwana.
“Impumelelo ayilinganiswa ngempumela yezifundweni kuphela, kodwa langendlela abafundi abaphatha ngayo abanye lezimiso abazifunda bekhula,” kutsho uMnu Kunzekweguta.
Ukhuthaze abafundi ukuthi bafunde ukuvuma amaphutha abo, ukuxolisa nxa bephambanisile lokulungisa ubudlelwano babo labanye.
Uthe ukuzithoba lokufuna ukuthula kuqakathekile ekwakheni umphakathi olobudlelwano obuhle, njalo abafundi akumelanga behlise isithunzi sabanye ngenxa yokuthi bona baphumelele.
Ekhuluma lalabo abamukele izicoco, uMnu Kunzekweguta ubatshayele ihlombe ngokuphumelela kwabo, wabuye wabakhuthaza ukuthi basebenze nzima njalo babe yisibonelo esihle kwabanye abafundi.
Uthe iMahatshula Primary School kumele iqhubeke ikhula njalo ithuthuka.
Inkuthazo kaKunzekweguta iza ngesikhathi izikolo ziqhubeka ziqakathekisa imfundo lokwakha ubuntu obuhle ebantwaneni, okugoqela ukubafundisa ukuhloniphana, ukuxolelana kanye lokuxa-zulula ukungazwanani ngendlela elokuthula.
