Online Reporter
Ethel Ncube
UKUKHIPHA impondo kumathole ngendlela eqondileyo kubalulekile kungakho kuyadingeka ukuthi abalimi babe lolwazi olujulilileyo mayelana ngemitshina okumele bayisebenzise nxa besenza lumsebenzi.
Lokhu kukhulunywe nguMnumzana Cosmas Muzunde onguDairy Officer esabelweni seMatabeleland North othe abalimi abafuya inkomo zochago kumele babone ukuthi balolwazi oludingakalayo nxa befuna ukukhulisa imhlambi yabo kunye lebhizimusi.
Uthe kuhle ukuthi osomabhizimisi benkomo zochago bakwazi imitshina okumele babelayo, ikakhulu le esetshenziswa nxa amathokazi ekhitshwa impondo.
“Abalimi kabahlale belolwazi njalo beludinge ngaso sonke isikhathi. Kulabo abakubhizimusi lokufuya inkomo zochago, sikhuthaza ukuthi basebenzise insimbi etshisayo nxa bekhipha impondo kumathokazi.
“Insimbi lezi kumele zitshiswe emlilweni njalo ekucineni kwensimbi kumele kube yisigombolozi ukuze ingene lapho okumila khona impondo, besebetshisa impondo ukuze zingaphindi zikhule,” kutsho uMnu Muzunde.
Uqhubekele phambili esithi ukukhipha amathole impondo kwenza ukuthi zingalimazani njalo engalwi.
“Sikhuthaza abafuye inkomo ukuthi bakhiphe amathokazi abo impondo phakathi kwamaviki amathathu kusiya kunyanga ezine ngoba yikho lapho eziyabe seziqalisa ukumila,” kutsho uMnu Muzunde.
UMnu Muzunde uthe kuqakathekile ukuthi abafuyi balandele izixwayiso abazithola kubalimisi lakwezinye ingatsha zokulima.
“Nxa sikhuthaza ngokukhitshwa kwempondo langokusebenzisa insimbi ezifaneleyo, sikwenza lokhu ngenjongo yokuthi sincedise abafuyi ukuze baphakamise ibhizimusi labo. Ukukhitshwa kwempondo kwenzelwa ukuthi inkomo zingalimazi muntu nxa zisengwa njalo lazo zingalimazani nxa zisemadlelweni ledibha.”
