admin
Ekukhuleni kwethu izikhathi ezinengi sasibalekela umama siqonde kugogo lokhulu ngoba sisazi ukubana bayasivikela lapho efuna ukusitshaya njalo basinakekela ngcono lapho abazali bethu bengekho eduzane.
Izikhathi ezinengi lapho umama esethe wadlula emhlabeni abantwana banakekelwa ngugogo ozala umama.
Ekubhubheni kwabazali kubakhona ingxabano lapho sokudonselwana ngokubana abantwana bazathiwani.
Ingxoxo ezinegi engibalazo lapho ngisemsebenzini eTrinity Project ziyangitshengisa ukuba ugogo lokhulu baqakathekile ezimpilweni zethu yiloba sesizintanadane.
Kule iviki ngithole ithuba lokuxoxisana logogo okuthiwa nguZondiwe Mdlongwa kanye lexhegu lakhe okuthiwa nguSamson Mwale. Ugogo lokhulu lo babhujelwa yindondakazi yabo okuthiwa nguSihle Mwale. USihle watshiya indodakazi yakhe eyodwa okuthiwa nguUnathi Mpofu. Uyise kaUnathi okuthiwa nguJoe Mpofu nguye owasala ephila.
U-Unathi wasala-ke egcinwa ngugogo lobabamkhulu wakhe ozala unina. UJoe Mpofu kakumphathanga kuhle lokhu njalo wazama ngazo zonke indlela ukuba athole indodakazi yakhe kodwa esehluleka ngoba abadala bemtshela ukuba yena ngowesilisa ngeke akhulise indodakazi yakhe ngendlela elohlonzi ngakho kulungile ukuba indodakazi yakhe ikhuliswe ngugogo loyisemkhulu yena ulakho ukuza ezoyibona izikhathi zonke.
Loludaba alumphathanga kuhle ngoba yena ezifunela ukuba azigcinele indodakazi yakhe eGoli. UJoe Mpofu wadinga amaqhinga okuthatha indodakazi yakhe. Wanyenya wafika watshontsha u-Unathi kanye lencwadi yakhe yokuzalwa kanye lencwadi yokufa kukanina.
Wahamba uJoe Mpofu lomntanakhe waqonda elizweni laseSouth Africa. Ugogo lobabamkhulu bakaUnathi babika emapholiseni ukubana umzukulu wabo setshontshiwe.
Kwatshitshiswana emapholiseni kanye lasemthethwandaba kwaze kwacina sokuthiwa umntwana kumele agcinwe ngugogo lokhulu ukuze akhule ngcono kodwa-ke uyise ulelungelo lokubana aze ukuzobona indodakazi yakhe.
Emva kokwahlulelwa enkantolo uJoe wasuka-ke wahamba waphulula lencwadi yokuzalwa. Ugogo lokhulu beza eTrinity bezodinga uncedo lokubana bangenza njani ukubana umzukulu wabo uUnathi athole eyinye incwadi yokuzalwa.
Okwakukuhle ngabo yikuba babe le-photocopy. Kumele babe lemali engange-$5 baqonde emahofisini akoMsitheli.
Kungakho baya emahofisini la bethwele njalo incwadi yasenkantolo bafika-ke bemukelwa kuhle babakhangelela incwadi yokuzalwa yomntwana ku-computer lakanye bambhadalisa i$5 njalo bathatha le-birth entry number.
Ngelanga elilandelayo babuyela koMsitheli bayithola incwadi yokuzalwa kukaUnathi.
Ngiloba nje ugogo lokhulu balilwela ilungelo likaUnathi wacina eselalo. Lokhu kuveza sobala ukubana ugogo lokhulu balakho ukugcina umzukulu njalo bamlungisele ilungelo lakhe lokwaziwa.
Kasihlanganeni njalo kuviki ezayo.
Umlobi uthinteka kunombolo zocingo ezithi 0773 195 055 lakukheli elithi [email protected]
Online Reporter