marble nkomo
Umdumo wenkondlo: N S Sigogo labanye
Inkondlo: Sengigugile Ngofa eyalotshwa A Z Mazinyane
Ophezulu Stinta, Umfanekiso
Ulimi lwembongi luyahlabusa ngempela. Lapho imbongi isethula izigaba zokukhula kwayo sifikelwa ngumfanekiso wengqondo lapho esibona khona ijaha elihambela phezulu liqinile, lihamba ngamandla wonke dukuduku silibone njalo lelo jaha lisiba ngubaba sibe lomfanekiso wengqondo owesilisa osengubaba. Kusenjalo kungani lesikhathi lesi siyahuba simbone futhi eselixhegu esegugile. Lokhu kuyawusabalalisa njalo lomqondo wethu size siyibone imbongi isifika esikhathini sokudlula emhlabeni lapho isidlule zonke izigaba zokuphila.
Isitsho
Imbongi isebenzise isitsho lapho isithi, lamuhla sengihamba ngenyawo ezintathu. Ngokudalwa umuntu wadalwa elenyawo ezimbili, ngakho imbongi nxa isikhuluma ngonyawo lwesithathu kutsho lapha-ke imbongi iyabe isidondolozela isihamba ngodondolo ngenxa yokuguga ayisakwazi ukuhamba ngenyawo zayo zombili zonke, sekudingwa olwesithathu ukuze yenelise ukuma lokuhamba okuludondolo lolu oselulunyawo lwesithathu.
Umbuzo ongadingi mpendulo
Imbongi ibuze umbuzo ongadingi mpendulo isithi “Manje ngiphilelani. Umbuzo lo awuphenduleki njalo awulayo impendulo ngoba sesiyibonile imbongi ikhula yaze yafika kusigaba sokuthi isihamba nzima yikho nje isize idinga lodondolo, kambe nxa isiphelelwe ngamandla kanje kuyini okunye engabuya ikwenelise ukukwenza, sekuyikuvumela imvelo kuphela idlulisele phambili okwemvelo yedlule emhlabeni engaselamandla okuhamba lokwenza loba kuyini kungathiwa usaphilelani emhlabeni.
Isitsho
Lapho imbongi isichaza ukuphela kwesikhathi sakhe sokuphila, ithi yona “amalanga ami asengangophondo lwembuzi” lapha ichaza ukuthi ngempela insuku zakhe zokuphila sezincinyane seziphelile yikho sezilinganiswa lobuncinyane bophondo lwembuzi.
Ukuphindwa kwamagama/ubungoma/ofanamsindo
Kusiqendu sokucina enkondlweni yonke, imbongi iphinda phinde amagama athile adale ukuthi lapho inkondlo ifundwa kube lobungoma thile obudalekayo.
Nxa inkondlo isijuluka ngengoma kuba mnandi ukuyifunda ingene ngaphakathi ize ivuse lemizwa etshiyeneyo. Ukuphindwa kwamagama lokhu singakunanzelela njalo njengemisindo efanayo, esithi thina ngofana msindo konke kudala ubungoma enkondlweni.
Online Reporter