Online Reporter
YiNtatheli kaMthunywa
KULEMULI yeChinhoyi elokhu isathithibele kulandela ukuvela kwehlazo lendodana yabo eleminyaka engu-18 ebihlangana emacansini lodadewabo oleminyaka engu-16.
Ihlazo leli livele ngemva kwenhlekelele lapho intombazana le egule yaphosa yafa ngemva kokuswela.
Ibizo likamsolwa kunye lomamangala ngeke siwachaze ngenhloso yokuvikela umamangala.
Umantshi womthethwandaba weChinhoyi uzwe ukuthi umsolwa ubehlala ehlangana emacansini lomamangala ngakibo eMadhuveko Village, koZvimba.
Umantshi unike umsolwa isigwebo sokuba aye ejele inyanga ezingu-12, inyanga ezine zalengiswa kukhangelelwe ukuthi kuminyaka emihlanu ezayo angadali icala elifanayo, kwathi inyanga eziyisificaminwe mibili zalengiswa njalo kukhangelelwe ukuthi asebenze amahola angu-280 kungelambadalo.
Inkundla izwe ukuthi umkhuba lo omubi wenzeke ngelanga elingaziwayo ngenyanga kaNkwenkwezi ngomnyaka ka2025. Umamangala wayelungiselela ukuya esikolo ngesikhathi umfowabo engena endlini yakhe, wamphulula umzimba andubana bahlangane emacansini.
Izelamani lezi zaqhubeka zihlangana emacansini ngezikhathi ezehlukeneyo okwabangela ukuthi umamangala acine ezithwele.
Ihlazo leli livele umamangala esegula kakhulu okwabangela ukuthi ahanjiswe esibhedlela odokotela bananzelela ukuba uswele, okuyikho okwenza kwachwayisiswa ngendaba le.
Amapholisa abopha umfowabo, okudale ukuthi avele emthethwandaba wagwetshwa.
Abatshutshisi baveze ukuthi indaba le iyisikhumbuzo esibuhlungu sokuthi ukuhlukunyezwa kwabantwana akwenziwa kuphela ngabantu abangabaziyo, omakhelwane loba abantu baphandle.
“Icala leli liveza ukuqakatheka kokuhlola abantwana, ngitsho labafowethu abasemzini owodwa, ngoba ukuhlukunyezwa kungenzeka phakathi kwezelamani,” kutsho ingxenye yesitatimende.
Abazali bakhuthazwa ukuthi bahlale beqaphele, bakhulume ngokukhululeka labantwana njalo nxa kukhona abakusolayo baxwayise abantwana kungakhathalekile ukuthi iqiniso lingaba buhlungu kangakanani.
INational Prosecuting Authority of Zimbabwe (NPAZ) iphinde yagcizelela ukuthi kuvikelwe abantwana njalo kuvezwe sobala ngokuhlukuluzwa okukhona ezimulini.
