Ukuthwetshulwa kwezichwayisiso

Siphathokuhle Ngulube

Salibonani bafundi.

Ngithemba liqhuba kahle ezifundweni zenu kanye lakuzichwayisiso zenu.

Engikukholwayo yikuthi sonke sesizenzile njalo sesihambisile kubabalisi ukuze bathwebule masinya ithuba lisesekhona.

Kumaviki amabili aphelileyo sike saxoxa ngokuthwebula kodwa asisakucubungulanga ngezigaba ngezigaba. Lamuhla sifisa ukucubungula isigaba sinye ngasinye.

Sitshilo ngeviki ephelileyo ukuba isigaba sakuqala silemiklomelo emihlanu.

Ivela ngaphi kanti leyo miklomelo? Uyithole njani? Kusigaba sakuqala kulokuqanjwa kwengxaki lapho umfundi aqamba khona uhlupho aselutholile njalo kuluhlupho sibili olukhanyayo. Nxa elubeke kuhle udaba lwakhe umfundi uyathola umklomelo owodwa.

Kusigaba sakuqala njalo umfundi ukhangelelwe ukuba achaze uhlupho ngamafitshane. Lapha umfundi uchaza nje ukuthi uhlupho lwakhe lolo ulubone ngaphi njalo uzalubamba njani.

Nxa ekwenze kahle lokho umfundi uphiwa imicijo emibili.

Esuka lapha umfundi kukhangelelwe ukuba achaze ngendlela akhangelele ukuthi uzaluxazulula ngayo udwetshu lwakhe.

Lapha sengabalisa ukuba uzaxoxisana labantu abathile adinge ulwazi, usengatsho futhi lokuthi uzagugula.

Umfundi uzabuya aqambe umqondo obanzi ngodwetshu lwakhe. Konke lokhu umfundi angakwenza kuhle uphiwa imiklomelo emibili. Ngokunjalo ke kuyavela ukuba imiklomelo kasigaba sakuqala mihlanu nxa umfundi enze kuhle.

Siyekusigaba sesibili, lapha umfundi ukhangelelwe ukuba achwayisise kabanzi ngesihloko sakhe. Angadinga ulwazi ngokubuza ebantwni abathile abuye njalo agugule ebulenjini kumbe njalo abale izingwalo ezithile.

Okunye njalo kulesi isigaba umfundi kukhangelelwe ukuba akhangele izindlela ezivele zikhona ezokuxazulula ingxaki yakhe. atsho ukuthi zimbi kumbe zinhle ngani.

Lesi isigaba siyayidinga sibili imicijo ebambekayo.

Umfundi kufanele ayichaze ngokugcweleyo indlela yakhe le aseyikhethile.

Konke lokhu okwesigaba sesibili kulemiklomelo elitshumi.

Ngithemba siyananzelela ukuba akulula nje ukuthola imiklomelo elitshumi kulesi isigaba. Isigaba sesithathu laso silemiklomelo elitshumi.

Lapha umfundi ukhangela ubuhle lobubi bezindlela zokuxazulula ingxaki ezivele zikhona eziqanjwe kusigaba sesibili.

Ubufakazi bokuthi zikhona izindlela zokuxazulula izingxaki ezivele zikhona, umfundi uphiwa imiklomelo emithathu. Ubuhle balezi izindlela bunika umfundi imiklomelo emithathu.

Ububi balezi izindlela zokuxazulula ingxaki labo bunika umfundi imicijo emithathu.

Ekucineni kuyakhangelwa isisindo somsebenzi womfundi nje jikelele abe sethola umklomelo owodwa.

Isigaba sesithathu sonke silemicijo elitshumi. Kusigaba sesine umfundi wenza lokho athe uzakwenza ukuxazulula ingxaki akhulume ngayo.

Nxa ethe abantu abasakwazi ukupheka ukudla wathi yena uzakupheka ukuze abakhumbuze, uzakwenza njalo. Lapha kukhangelelwe ukuba akwenze ngendlela elandelekayo ukuze longakwaziyo ukukwenza lokho alandele.

Nxa enze kuhle lapha uthola imicijo elitshumi. Isigaba sesihlanu silemicijo elitshumi.

Lapha umfundi uletha impumela yalokho akwenze kusigaba sesine.

Isigaba sesithupha silemicijo elitshumi.

Lapha umfundi ukhangela izinkinga ahlangane lazo aphe lezixwayiso.
Konke lokhu kulemiklomelo emihlanu.

Yiyo ke indlela esifika ngayo kumiklomelo elitshumi kuzichwayisiso zethu.

Asinanzeleleni ukuba kufanele sisebenze nzima ukuze sithole yonke le imiklomelo. Asihlanganeni ngeviki ezayo.