Online Reporter
YiNtatheli kaMthunywa
UKULIMA isilimo esisodwa isikhathi eside emhlabathini munye kuyingozi ngoba sokungenza umlimi acine engavunanga kuhle.
Ekhuluma lo Mthunywa, uNkosazana Siphilisiwe Moyo ongumlimi ubike ukuthi abalimi balime ngendlela ye-crop rotation. Uthe le yindlela yokulima izilimo ezitshiyeneyo umnyaka ngomnyaka endaweni eyodwa njalo lokhu kugcina imvudiso yomhlabathi okwenza izilimo zikhule kuhle
“Akusilocebo elihle ukulima endaweni eyodwa isikhathi eside kumele kutshintshaniswe izilimo ukuze umhlabathi uthole imvundiso,” kuchaza uNkszn Moyo.
Ubuye wathi i-crop rotation iyanceda izilimo ukuthi zingahlaselwa yizibungu
“Kulezinye izibungu ezivele zilomhlobo wesilimo sayo esizidlayo ngakho umlimi engabe ephindaphinda isilimo esisodwa uyabe usenza ukuthi zibe lokhe zibuya kodwa ungatshintsha isilimo kuyasiza ukuthi zibaleke
“Okunye njalo ukulima isilimo esisodwa isikhathi eside kwenza umhlabathi ubesengozini yokukhukhuleka ngakho i-crop rotation iyancedisa ekuvikeleni ukukhukhuleka komhlabathi,” kulandisa uNkszn Moyo.
Uqhubeke elandisa esithi: “I-crop rotation iyancedisa ukuthi umhlabathi ugcine amanzi. Ungalima isilimo esisodwa isikhathi eside umhlabathi ucina uwoma ungenelise ukuthi ugcine amanzi ngakho indlela le yokulima iyaphathisa umhlabathi ekugcineni amanzi
Uphethe ngokuthi abalimi bengalima ngalindlela bazabona bethola isivuno esihle kuzilimo zabo.
“I-crop rotation ayilahlisi nxa ungumlimi ungasebenzisa yona uzabona usiba lesivuno esihle kakhulu,” kuphetha uNkszn Moyo.
