Online Reporter
NJENGOBA kuqhubeka inyanga kaNhlangula, eyaziwa langokuthi yi-Men’s Health Awareness Month, inkampani yezempilo ezimeleyo, i-Viatris, isixwayise abesilisa ukuthi baqaphele inkinga yokungaqini kwenduku ngokwaneleyo. Linkinga ijwayele ukubizwa ngokuthi yi-erectile dysfunction.
Abe-Viatris bathe loba izingxoxo ezinengi ezithinta izifo ezihaqa abesilisa zivame ukugxila kakhulu esifeni senhliziyo, esetshukela lomdlavuza wendlala yabesilisa i-prostate cancer kodwa kusemqoka lokunaka izimo eziyamene lezocansi.
Lokho abesilisa bengakwenza ngokuthi baqikelele ukuhlala bezihlola ukuthi konke kusahamba kahle yini, bengalindi ukuthi beze begule ngokweqileyo andubana basukume. Umbuzo omkhulu ngothi iyini yona i-erectile dysfunction?
Lesi yisimo sokungaqini ngokwaneleyo kwenduku yomuntu wesilisa. Sivama ukuhlupha abantu besilisa abanengi, osekuvele ukuthi ukudloba kwaso kungaphezu nje kokuba yinkinga eyamene lezocansi.
Ucwaningo lwabezempilakahle luveze ukuthi i-ED ingaba lezimpawu zezinye izifo ezikucathamelayo okungaba yisifo setshukela, umfutho wegazi ophezulu, ukukhuluphala ngokweqileyo leziyamene lokusebenza komqondo.
UDokotela Shingai Mutambirwa weSefako Makgatho Health Sciences University yena uthe: “Abantu abanengi bavame ukuzitshela ukuthi lesi simo siyinto nje engatheni, ekubeni iqiniso yikuthi singaba yizimpawu zokuqala ezikhomba ukuthi ucathanyelwa yizifo ezibucayi. Kungakho-ke kumqoka ukuthi uphangise usisukumele, ungasithathi kancane ngoba siyingozi.”
Ucwaningo olusanda kwenziwa ngabezempilakahle lugqamise ukuthi lesi simo sitshaya kakhulu abantu besilisa beNingizimu Afrika, okufakazelwe lucwaningo olwenziwe emitholampilo ehlukeneyo yeThekwini – oluveze ukuthi babe ngu-64,9% abesilisa abahlolwe, kwatholakala ukuthi balale nkinga, inengi labo ngeselikhulile lelilezifo eziyimbelesela njengeshukela le-BP.
Inhloko yeViatris South African, uMnumzana Aman Khanna, uthe okuhle ngalesi simo yikuthi ukuvela kwaso kuyasiza ukuthi lo esivele kuye aphangise abone noma athole uma kulezifo ezimcathamelayo, okumsiza ukuthi akwazi ukuzihambela phambili.
“Yingakho sikhuthaza abantu ababa lalesi simo ukuthi bengafeli phakathi ngenxa yokwesaba ukuphoxeka kepha abasukume ngokuphangisa ukubheka lokuthola ukuthi sidalwa yini ukuze kube lula ukuthi kuphangise kunqandeke umonakalo,” kutsho uKhanna. —Isolezwe
