Online Reporter
Ethel Ncube
UMHLABELELI wamapiano kweleSouth Africa uLeemckrazy uzakwethekelela eGwanda ngoLwesihlanu kuyonale iviki.
ULeemckrazy uzabe ejabulisa abantu emcimbini wePiano Heist oqoqwe ngabePhoenix Shisanyama edolobheni leGwanda.
Abahlabeleli abazabe bekhona kuPiano Heist nguHulengende loMalotti, Quonfuzed kanye loBry eze kuthi oDJ abazabe betshaya lapho ngababalisa iJaziri brothers, Tmmzy T, Scott Mangena,Virus, Keitho, leBeitbridge Channel.
Ekhuluma lentatheli uTapiwa Gandiwa ongomunye wabaqoqi bomcimbi wePiano Heist ubike ukuba amalungiselelo ahamba kuhle.
“Siphezu komsebenzi wokulungiselela umcimbi wePiano Heist ozabakhona lapha ngoLwesihlanu ntambama, edolobheni leGwanda. Amalungiselelo ahamba kahle kakhulu njalo sikhangelele ukuba ngoLwesihlanu emini uLeemckrazy ehle ngendizamtshina egcekeni leJoshua Mqabuko Airport andubana adlulele edolobheni leGwanda.
ULeemckrazy usebikile ukuba kasoze aphuthe, uzabuya, njalo lathi simlindele ukuze siyekholisa laye eGwanda,” kutsho uGandiwa.
Uqhubekele phambili waveza ukuba kuzabe kulabanye abaculi.
“Emcimbini lo, kuzabe kulabanye abahlabeleli abakhonapha kwelakithi. Sithanda ukunxusa uzulu sithi owenelisa ukuyafika ePhoenix Tshisanyama eGwanda abuye, ziyabe zisiwa konke kuyabe kukhona okwakho yikubuya labangane bakho lizojayiva likholise amapiano lezinye ingoma. Singakhohlwa umcimbi ungoLwesihlanu 12 Mpalakazi ntambama, asihlanganeni khona,” kuphetha uGandiwa.
